Unidad Canino hudicial di KIA a ricibi 10 unidad di transporte for di hulanda.

Recientemente Minister Arthur Dowers a bishita e Centro di entrenamento di husticia na Balashi pa ricibi diferente vehiculo cu a yega for di hulanda pa e unidad canino di husticia cu ta ocupa su mes cu e  Instituto Coreccional  (KIA).  E vehiculonan aki lo juda e unidad aki den e trabou cu nan ta haci diariamente entre otro e guia di preso  cu mester presenta na corte di husticia.

Sr. Dick Van Leenen  cu ta hefe di e unidad canino di KIA  a remarca di ta contento di por a ricibi 5 unidad volkswagen transporter color shinishi y 5 color preto full equipa pa transporta cachonan di husticia, remplasando asina  algun di e unidadnan  cu no ta den e estado mas optimo  pa opera aden.

Tin un cooperacion hopi extenso cu e coleganan den reino hulandes,  cu ta haci posibel intercambio di material y tambe sostene otro na momento cu esaki ta necesario.

E Titular di husticia ta satisfecho  di por mira e fruto di e tempo inverti den e cumbre hudicial entre e minister nan di husticia di reino cu ta dunando su fruto, mirando cu algun tempo atras a haya varios unidad nobo pa Cuerpo Especial Arubano (CEA)  por cumpli cu e  transporte di preso,  awor ta turno di e unidad canino di husticia encarga di KIA  y pronto nos institucion coreccional (KIA) lo ricibi material nobo.

CEA por sigui haci nan trabou cu busnan nobo

Dialuna mainta na Cuerpo Especial Arubano (CEA) a ricibi algun auto nobo pa asina nan por sigui haci nan trabou. E busnan a bin di Hulanda y Aruba tin un cooperacion cu Dienstvervoer en transport na Hulanda.
E departamento aki ta parecido na CEA, pero e unico cos ta cu e departamento ey ta haci ta un parti mas amplio cu transporte di tur tipo di preso, preso peligroso, terorista y los for di Cuerpo Policial Hulandes. Tambe nan tin material special cu nan ta uza pa esaki tambe y Aruba tin e cooperacion cu nan ta pasa e material pa aki, Minister di Husticia, Drs. Mr. Arthur Dowers a remarca. Na Hulanda nan tin rekisitonan hopi mas streng pa loke ta trata transporte y Aruba ta haya material e ora for di nan. “Den e ultimo tempo nos a logra yega na un cooperacion cu nos ta haya e autonan mas lihe. Y esey ta mustra tambe cu e ta facilita nos trabou, pasobra e ta un cooperacion caminda cu bo ta logra di pone bon material den disposicion di nos departamentonan”, Minister Dowers a remarca. Tambe e ta facilita no solamente pe trabou di trahadonan, pero ta transporta e preso tambe y ta transporta nan den condicionnan mas miho. E tambe ta alivia e trabounan, pasobra nan lo ta menos agita. “Con cu bay bin nan a comete un crimen, pero esey no ta nifica cu nan mester pasa den condicionnan mas fastioso cu tin”, asina Minister Dowers a remarca. Minister di Husticia ta contento cu e busnan aki tambe den servicio y tin servicionan mas miho cu antes. Por mira e cooperacion y relacion entre e diferente ministerio di Husticia di Reino ta sumamente bon. Esaki a bira hopi mas miho den e ultimo añanan y ta spera cu esaki lo keda asina aki of bira mas miho.
“Nos ta preparando na e momentonan aki pa bay e siguiente JVO cu lo bay ta na Juni na St. Maarten. E momento ey nos lo bay reitera e importancia di e cooperacion cu nos tin entre diferente ministernan”, Minister Dowers a remarca. Pa Ministerio di Husticia e siguridad di trahadonan ta hopi central, pero logicamente cu e trahadonan ta forma parti di comunidad. General Ministerio di Husticia ta traha pe siguridad di tur hende, pero na momento cu bo ta haci trabou bo mester percura pa tin material cu hendenan por haci nan trabou mas optimal cu ta posibel. “Un di e cosnan cu a demostra den e ultimo añanan ta cu e trahadonan ta sinti su mes mas confortabel mas positivo y mas dispuesto pa traha y duna mas di su mes, ora cu bo percura tambe di bo banda di cumpli cu loke e trahado tin derecho riba dje”, Minister Dowers a remarca. Grandemente nan a logra esey den na tur departamento, pero semper tin cosnan cu mester mehoracion. Semper tin cosnan cu despues di a logra yega un nivel hopi halto, mester bay atras pero esey ta parti di bida. E trahado mester ta convenci cu como dunado di trabou ta para pe y cu tin su interes na pecho. Minister di Husticia ta kere cu esey ta hopi cla cerca mayoria di trahado di husticia cu e cos a cambia y cu ta para 100% tras di trahadonan.

Minister Dowers a entrega Decreto Ministerial na 30 miembro di Interne Bijstands Team

20161117-minjus-ibt-01

Diahuebs mainta na Centro di entrenamento na Balashi,  a tuma lugar entrega di envelopnan cu e Decreto Ministerial  na miembronan di e “Interne Bijstands Team”.

E decreto aki ta regla e compensacion pa 30 miembronan aki  di e team aki. Presente na e ocasion  aki, tabata  e directornan di: Instituto Correcional Aruba (KIA)  sr. Rocco Tjon, e Director di Cuerpo Especial Arubano (CEA) sr. Ronny Geerman  y e lider di team aki  sr. Dick van Leenen.  E decreto aki mester a  keda regla hopi tempo atras caba, sinembargo “algo a bai fout”cu a percura pa e tardansa di esaki, sinembargo Minister Dowers ta contento cu esaki a keda concretisa  y cu awe e  miembronan di e unidad aki por ricibinan compensacion aki.   E titular di husticia a jama e miembronan di e team aki  danki pa a acepta e reto aki mirando e situacion di  e prizon den cual nan mester labora na momento  cu  nan mester enfrenta e prezonan.  E mandatario a termina gradiciendo cada un pa nan dedicacion, pasobra sin nan no tin un IBT Team.

 

Trahadonan di C.E.A demostrando iniciativa propio

DSC_7844

E motivacion y iniciativa propio demostra recientemente pa un grupo di empleadonan di Cuerpo Especial Arubano a haci un bon impresion riba Minister di Husticia mr. Drs. Arthur Dowers y el a expresa elogio pa nan esfuersonan durante di e entrega di diploma pa e curso Hurricane Evacuation Alert . E curso aki a wordo organisa pa e team di tata y yiu Boye, esta Rooney Boye y Rygel Boye, hunto cu e coleganan di Cuerpo Especial Arubano (CEA) cu tabata kier amplia nan conocemento riba e tereno.

Minister Dowers a laga sa cu e esfuersonan cu nan a haci tin como resultado cu e lo haci esfuersonan pa ora cu trahadonan kier bay dilanti y traha na un forma mas saludabel, su ministerio lo contribui na esaki.

E mandatario a bisa cu ora cu algun aña pasa a cuminsa ofrece cursonan na e personal di e departamento a tuma nota tambe cu e mas y mas trahado kier ta parti di e formacion y desaroyo cu ta prepara nan pa haci nan trabao miho, pa sirbi comunidad miho y pa nan mes desaroyo como profesional.

E miembronan di CEA mes, hunto cu famia Boye, a organisa e curso y Minister Dowers a comenta cu lo pone medionan financiero disponibel pa mas curso, incluyendo esunnan pa cual lo mester trece instructornan for di exterior. Esaki ta un forma cu su ministerio ta sostene CEA, cu a demostra di ta un grupo di colega cu iniciativa pa haci loke nan mester pa amplia nan conocemento y habilidad nan, y no ta sinta warda pa cosnan wordo organisa pa nan, pero ta tuma e responsabilidad pa nan tareanan, y ta determina pa sirbi comunidad miho.

El a agrega cu e ta spera cu nan logra motiva otro coleganan pa participa y a positivo den nan desaroyo propio, nan desaroyo den nan trabao, y desaroyo di e organisacion. Minister Dowers a conclui bisando cu e ta spera cu nan no mester pone di practica loke nan a siña, sinembargo mester reconoce tambe cu nan trabao y ramo di husticia en general, ta bin cu risiconan pa e persona cu ta traha den e funcion y e tin respet y elogio pa nan determinacion pa tin mas conocemento y habilidad nan necesario pa maneha nan tareanan miho.