Luznan den Bario ta hisa e nivel di bida di e ciudadano

Instalacion di luznan den bario no ta un maneho ad hoc, pero ta un forma bon pensa cu por brinda e ciudadano mas siguridad den su bida diario. Esaki ta loke Minister di Husticia Arthur Dowers a bisa riba e tema aki.Parti di maneho di Gabinete Mike Eman II ta dirigi riba aumenta siguridad den tur bario. “Ora nos ta papia di siguridad , no ta papia unicamente di reduci e riesgo cu un persona ta comete un crimen contra otro. Pero tambe den esfera preventivo, unda cu por limita of reduci e chens cu un persona por haya e oportunidad di comete crimen. Esaki ta nifica cu mester inverti tambe den infrastructura den barionan pa crea barionan mas sigur. Tambe luznan den Bario ta hisa e nivel di bida di e ciudadano,” Minister Dowers a bisa .

El a splica cu un di e instrumentonan pa yuda yega na e meta ariba menciona ta luznan den bario. Ora cu tin mas claridad den e barionan, e ta menos facil cu delincuentenan por sconde den areanan pa planea delitonan. “E cambionan tecnologico haci a haci un contribucion na reduci gastonan.” Den e caso di introduccion di luz LED pa iluminacion di caya, a trece un reduccion di gasto pa Gobierno y esaki no ta faborece ningun hende pero ta inverti esaki pa cumpra mas luz pa e barionan unda tin scuridad.”

E mandatario ta admiti cu ainda tin hopi bario cu falta pa haya iluminacion, pero tin di nan cu tin un infrastructura complica cu mester wordo adapta y esnan concerni ta studiando esaki. Un di e barionan aki ta Seroe Patrishi y ya caba a busca conseho cerca DTI y ELMAR, con pa cambia e sistema di coriente cu actualmente ta core bou tera. Tin varios cambio a wordo haci den e bario pa brinda siguridad, pero ta keda falta e aspecto di mas siguridad. Ta algo cu Gobierno ta trahando riba dje.

E programa Luz den Bario ta un iniciativa cu Prome Minister Mike Eman a cuminsa cune na cuminsamento di 2013, debi na e tantisimo demanda cu tabatin di parti di e ciudadanonan.

E ta un contribucion cu Gobierno ta obliga pa duna pueblo

Minister di Husticia Arthur Dowers tabatin e honor di cende e prome luz LED di caya den e bario di Paramira, cu ta keda net patras di stadion di RCA na Solito. Un bario nobo, cu casnan bunita, pero cu no tabatin luz di caya. Algo cu a cambia e siman aki.

Diahuebs anochi Minister Dowers, den presencia di su colega di Infrastructura Benny Sevinger, a cende e luz cu a trece un alegria grandi pa e habitantenan. Aunke cu e bario ta basta bon desaroyo, tin algun aspecto, manera iluminacion di caya cu tabata falta. Gobierno tabata consciente di esaki. E deficiencia den luz di caya ta algun cu a wordo neglisha pa algun decada te ora cu Gabinete Mike Eman I y II a yega pa goberna. Minister Dowers a pasa den e bario aki recientemente y un biaha mas a scucha e habitantenan riba nan preocupacion pa e scuridad den e bario, y a duna nan e bon noticia cu pronto nan lo mira mira cambio den esaki. “E cambio a yega. Nos ta sumamente contento di ta aki,” e mandatario a bisa diahuebs anochi.

Minister Dowers a splica cu na momento cu a bay campaña 4 aña pasa a uza e slogan “ainda falta”, pasobra segun desaroyo tuma luga den un pais cada bes tin cosnan cu mester wordo haci. “Nos ta contento cu awe nos por cumpli cu un bario mas y duna un contribucion di e forma aki na aumento di siguridad y reduccion di riesgonan.” E iluminacion di barionan ta un aspecto hopi importante, y e Gobierno cu e ta forma parti di dje ta kere cu e tin e obligacion pa duna e contribucion aki na e comunidad “cu a sostene nos, pasobra nan a mira cu nos a pone prioridadnan na loke ta importante pa e pueblo.” Pero e mandatario na mesun momento a bisa cu tin hopi cos mas pa haci ainda, den e bario di Paramira y otro barionan.

Durante e proximo siman personal di ELMAR lo ta trahando pa instala luz LED den henter e bario. Mirando e eficiencia di e tipo di luznan aki, nan ta wordo instala cada pasa un palo di luz. Programa Luz den Bario ta algo cu Gabinete Mike Eman a bin ta trahando riba dje for di aña 2012, basa riba peticion di habitantenan di diferente bario pa haya mas iluminacion di caya.

 

Unidad Canino hudicial di KIA a ricibi 10 unidad di transporte for di hulanda.

Recientemente Minister Arthur Dowers a bishita e Centro di entrenamento di husticia na Balashi pa ricibi diferente vehiculo cu a yega for di hulanda pa e unidad canino di husticia cu ta ocupa su mes cu e  Instituto Coreccional  (KIA).  E vehiculonan aki lo juda e unidad aki den e trabou cu nan ta haci diariamente entre otro e guia di preso  cu mester presenta na corte di husticia.

Sr. Dick Van Leenen  cu ta hefe di e unidad canino di KIA  a remarca di ta contento di por a ricibi 5 unidad volkswagen transporter color shinishi y 5 color preto full equipa pa transporta cachonan di husticia, remplasando asina  algun di e unidadnan  cu no ta den e estado mas optimo  pa opera aden.

Tin un cooperacion hopi extenso cu e coleganan den reino hulandes,  cu ta haci posibel intercambio di material y tambe sostene otro na momento cu esaki ta necesario.

E Titular di husticia ta satisfecho  di por mira e fruto di e tempo inverti den e cumbre hudicial entre e minister nan di husticia di reino cu ta dunando su fruto, mirando cu algun tempo atras a haya varios unidad nobo pa Cuerpo Especial Arubano (CEA)  por cumpli cu e  transporte di preso,  awor ta turno di e unidad canino di husticia encarga di KIA  y pronto nos institucion coreccional (KIA) lo ricibi material nobo.

Directiva Nobo di SPA di bishita sera Minister Dowers


d.r.p.d: vice-president Jean Mark Lampe, president Edgar Maduro, secretaria Dyanira Boekhoudt – Dijkhoff y Junior Tromp como tesorero
Sindicato di Polis a conoce  un directiva nobo  y a realisa un bishita  cerca Minister di Husticia Arthur Dowers, den su despacho situa den “cocolishi”.
Asina mes cu e reunion aki tabata mas bien un introduccion na e mandatario, a probecha di combersa di biaha riba algun puntonan di atencion cu miembronan di Cuerpo Policial semper  tabatin.

E president nobo di SPA , den persona di sr Edgar Maduro, a splica e titular di husticia cu e  interes cu SPA tin, ta pa hiba un dialogo di negosacion cu e.o.  e mandatario  di husticia, pa di e forma  aki nan por logra metanan concreto na bienestar di nan miembronan.

Minister Dowers a desea nan tur clase do exito den nan funcion como sindicalista.

Minister Arthur Dowers contento cu e camaranan nobo di KIA


Nos ta sumamente contento con e trabounan a bay pa cu instalacion di camaranan nobo den K.I.A., Minister Dowers a cuminsa bisa na invitadonan special na Instituto Coreccional Aruba, conoci como K.I.A. Esaki despues cu e compania local SafeCom a haci entrega oficialmente di e proyecto aki.
Segun e mandatario cu e la keda impresiona con professional e equipo di SafeCom a traha. Esaki pasobra tin hopi protocol cu mester cumpli cu ne den un instituto manera K.I.A. y mas ainda ora ta trata di laga otro personanan drenta den e edificio aki cu no ta trahador y pa nan haci un trabou di tal magnitud, ta di admira e seriedad cu e trahadornan aki tabata tin. Na ningun momento a ricibi niun clase di keho di e trahadornan aki y na momento cu un partner externo bin traha cu husticia, e mester ta uno di confiansa complete y no tin niun clase di duda riba e integridad di e compania SafCom, Minister Dowers a enfatisa bisando aserca cu e ta spera di por sigui traha cu e compania aki tambe den futuro.E camaranan sofistica aki lo garantisa e seguridad , di no unicamente di e trahadornan como e bishitantenan, pero sigur tambe di e presonan mes. “Nos tarea como ministerio di husticia ta pa detene hende y ora nan bin K.I.A., nos mester brindanan e seguridad tambe. Awor si un preso dicidi di viola ley, e video lo yuda den e proceso penal tambe contra di esun cu ta kere di por burla di nos systema hudicial”, Minister Dowers a bisa.

Minister Dowers contento con e proceso di renovacion den KIA ta canando


Durante e bishita recien di Minister di Husticia Arthur Dowers na e Instituto Correccional (KIA), a pasa na e seccion di e instuto caminda e detenidonan ta wardando riba nan castigo, conoci como “Huis van Bewaring”.
A conclui e renobacion di e huis van bewaring, faltando algun detaye ainda den e area di recreo caminda cu e personal di e instituto lo por guia e detenidonan hopi mas organisa nan momento di ricibi diferente entrenamento. Esaki lo bai pone cu e Instituto ta cumpli aun mas ainda cu e exigencianan di e commision contra tortura y maltrato di detenidonan (CPT), cu un di nan exigencianan ta cu un detenido mester tin tanto recreo como educacion y formacion durante e periodo cu nan ta encarcela den e instituto aki. E seccion di straf, cu algun tempo atras sufri daño di candela, cu ta den e proceso di renovacion ta bayendo den bon direccion. Na momento cu e renovacion aki keda completa den algun siman, lo por haci uso di 16 cel adicional den e seccion aki. Tambe e titular di husticia a tuma nota cu algun prisonero, bou guia di e contratista ta haciendo e trabounan di renovacion den e instituto aki. Minster Dowers ta di opionion cu esaki ta un Adelanto hopi grandi na momento cu e hobennan encarcela ta siña un ofishi, lo por bandona e institucion aki cu e conocemente adkeri y por bai eherce e ofishi aki den sociedad.

Minister Dowers a introduci e plan di maneho nobo pa husticia


Diaranzon anochi na surf side marina, Ministerio di Husticia a tene un anochi di informacion encuanto di e plan di maneho nobo 2017 / 2020, cual ta hiba e nomber di, “Iedereen draagt zijn steentje bij aan een veilige samenleving”.

Presente na e anochi aki, tawata tey mayoria di e hoofd van diensten cu ta cay bou di ministerio di Husticia, pero tambe varios otro stakeholders como tambe gremionan cu a wordo invita na e anochi aki. E anochi riba su mes a wordo dirigi y modera pa señor mr. Luciano Milliard di universidad di Aruba, caminda cu hopi informacion a wordo comparti cu un sala completamente yen. E criminoloog, esta sra. mr. Simone van der Zee, a duna un amplio splicacion den comportamento di un persona dependiendo di su situacion durante su proceso di crecemento. Segun e criminoloog cu e prome 6 aña di un mucha ta esencial pa e ricibi un bon guia for di su mayornan. Sra. Simone van der Zee a duna dos di ehempel con sierto situacionnan na cas por afecta e comportacion di un mucha segun cu e ta crece. Pesey segun e criminoloog, cu e ta di sumo importancia, cu un famia no solamente mester consisiti di mama y tata of alomenos un figura paternal, pero mas bien cu e mama y tata ta brinda e mucha e atencion y guia corecto pa e por crece cu norma y balor. Despues di su splicacion amplio como experto riba e materia aki, Minister di Husticia, mr. drs. Arthur Dowers, a hiba palabra y a splica kico tur ta e contenido den e plan di maneho nobo pa 2017 / 2020. E titular di husticia a splica cu despues cu e base a wordo poni enter 2013 pa 2017, awor lo enfoca riba e continuidad di esaki. Minister Dowers a remarca u un di e retonan grandi cu su persona tawata tin, ta pa logra cu diferente departamento traha di un forma mas estrecho cu otro y cu awor, esta algo mas di 7 aña despues e ta mira cu e la duna su resultadonan positivo.

Pesey mes cu e titular encarga cu husticia ta convenci, cu esaki ta trahando na bienestar di nos comunidad y cu pa tal motibo mes tambe cu awor aki lo bay implementa e plataforma asina yama ‘veiligheidhuis’. E veiligheidhuis aki lo wordo forma pa diferente departamentonan kendenan lo bay tin un rol importante den e parti di prevencion, den e sentido general. Por ultimo sr. Jairo Boekhoudt, a duna un presentacion di un applicacion digital, como un herment moderno pa yuda den e area di prevencion of mihor bisa pa suministra informacion den e caso aki na Cuerpo Policial. Sr. Boekhoudt a splica cu su persona tin varios luna den discucion hunto cu minister Dowers riba e topico di prevencion y cu su compania a haci un estudio gratuito pa contribui na nos comunidad riba e topico di seguridad. E plataforma y/of aplicacion digital aki (app) a haya un hopi bon acogida serca tur es nan presente, despues cu sr. Boekhoudt a duna un amplio splicacion riba esaki. Segun comentario nan di sr. Boekhoudt mes, cu e ta masha contento cu minister Dowers a brinda su persona e oportunidad aki, mientras cu minister Dowers a remarca cu ta netamente e idiologia aki su persona y e gabinete completo, ta purba di inculca den nos comunidad y e ta contento cu e mensahe ta jegando cada bes mas y mas den nos comunidad. Na final di e presentacionnan, publico tawata tin e oportunidad pa duna remarke como tambe haci preguntanan, di cual varios persona den publico a haci uso di e oportunidad aki. Tambe minister Dowers a percura pa tur es nan presente ricibi copia di e plan di maneho. E intencion ta, pa a corto plazo hiba un discucion riba un nivel academico, cual lo bay tuma lugar den e aula di Universidad di Aruba, caminda cu pa e anochi aki lo bay tin varios Criminoloog tambe presente pa cu e debate.

Minister Dowers a bay mira desaroyo Proyecto “Camera Kamer” pa KIA

Ministerio di Husticia tin diferente Proyecto y programa andando. Un di nan ta e “Camera Room”cu ta wordo construi na Instituto Coreccional KIA, na Santo  Patia. Mirando cu e Proyecto ta basta avansa, e mandatario a bay mira con e plannan ta avansando.

E mandatario a wordo informa cu e Proyecto di camera pa KIA ta den e fase final caba, pues ta canando segun e programacion. Durante e bishita e mandatario a sera conoci cu e personanan cu lo bai traha den e “Camera Room”  cu a cuminsa ricibi nan entrenamento for di e compania local Safecom. “Mi tabata presente na inicio di e proyecto y awe mi tin cu bisa cu mi ta sumamente contento cu nos a logra implementa e proyecto. Tin algun detaye chikito cu falta pa loke ta e software. Despues di esaki ta keda solamente entrega di e proyecto,”Minister di Husticia Arthur Dowers a comenta.

E mandatario ta considera esaki un joya di proyecto cu lo bay contribui cu e institucion aki ta aumenta e aspecto di siguridad, cu ta masha importante, pero ta crea un miho proceso di integridad. E “Camera Room” ta permiti autoridadnan concerni pa haci un miho investigacion denter di e instituto penal ora cu algo bay robez. Minister Dowers ta manda palabra di felicitacion pa personal di KIA y Aruba cu e logro aki den mehoracion di cuido di e prison di Aruba. Di e forma aki, e personal di KIA ta haya un otro instrumento pa por ehecuta nan trabou di un miho forma

 

2 Bombero di Aruba rumbo pa Trinidad & Tobago pa sigui curso

Dialuna mainta dos miembro di cuerpo di bombero Howard Hoo y Rodney de Cuba a Sali rumbo pa Trinidad & Tobago pa asisti  na un curso di e compania MSA cu ta e marca di e aparatonan resiratorio cu ta wordo usa na cuerpo di bombero.  Di e manera aki cuerpo di bombero  di Aruba lo por conta riba  dos tecnico certifica pa por traha riba e equipo respiratorio  y asina sigura uso safe di e aparatonan aki. Na Aeropuerto Reina Beatrix funcionarionan di cuerpo di bombero conhuntamente cu comandante Edward de Cuba y Minster di Husticia Arthur Dowers a dispidi di e dos bomberonan y a desea nan tur clase di exito den exterior.

 

Hopi hende no ta compronde e tema di abuso sexual di mucha

Diamars atardi Fundacion Respeta Mi a presenta e tema di Abuso sexual di mucha y Minister di Husticia, Mr. Drs. Arthur Dowers ta contento cu nan a haci esaki. “Ora cu tin discusion ariba abuso sexual y hopi hende no ta compronde e materia y e ta bira hopi bes un discusion emocional sin cu ta compronde kico e complicidad di e materia ta”, Minister Dowers a enfatisa.
Ta mira cu mayoria caso di abuso sexual cu ta tuma den famia, ta haci’e hopi dificil pa atende cun’e y preveni. Esey no ta nifica cu no mester haci mas esfuerso. Loke a demostra por medio di materialnan informativo, nan por yega cerca muchanan, potencial victimanan, pero tambe hendenan cerca di e victimanan cu por tende algo, compronde algo. Papiando por saca for di un victima of un potencial victima for di un situacion fastioso. E ta bon y e mandatario ta haya cu mas di e fundacionnan ta uniendo forsa pa asina combati e fenomeno aki. Na final di dia e fenomenonan aki ta nifica actonan criminal, pero tambe nan ta nifica actonan di violencia contra hende cu tin consecuencianan hopi grave fisicamente y mentalmente pa henter nan bida. Ora cu preveni esaki tin un ganashi caba, pero asina cu algo pasa cu e mucha por drenta den accion lihe y trat’e, dun’e cuido y guia. Pa asina minimalisa e trauma cu a sufri. Minister ta kere cu esaki tin mas balor cu e modo cu hopi biaha hendenan ta reacciona manera aworaki. “Mi ta hopi contento, mi ta felicita fundacionnan cu conhuntamente cu esunnan di departamento di Gobierno pa atende cu e tema asina complica.” E tema di sexualidad ta un tema hopi compleho y hendenan tin otro pensamento na con mester atende cu informacion riba sexualidad.
Tin hende ta bisa ora cu duna muchanan informacion riba sexualidad mas trempan, nan ta bay experimenta y tin hopi teoria. Mester informa muchanan di kico mag y kico no mag y esey ta e base pa ta proteha. “Si bisa e mucha cu hende no mag di mishi bo na cierto caminda. E mucha sa cu na momento cu nan kier haci esey ta algo fout, e por denuncia esey na su mayor of na un hende grandi.” Hopi bes ta e mayor mes ta e abusado pero e ora e mucha por papia cu otro mucha of cu juffrouw na scol, un famia, un wela, un tanta, pa asina ey e mucha por haya ayudo. “Na momento cu haci esey tuma luga tambe tin otro aspectonan masha complica lo bin dilanti. Ta hopi importante pa informa trempan y pa denuncia e cosnan aki pe bienestar di muchanan”, Minister Dowers a remarca. E departamentonan di Ministerio di Husticia t’ey pa proteha muchanan. E departamento di recherche di Polis ta ekipa pa atende cu na momento tin problema, pero esunnan cu ta e prome yama ta e trahadonan riba tereno preventivo, social, educativo. Nan por haci un diferencia hopi mas grandi.