Unidad Canino hudicial di KIA a ricibi 10 unidad di transporte for di hulanda.

Recientemente Minister Arthur Dowers a bishita e Centro di entrenamento di husticia na Balashi pa ricibi diferente vehiculo cu a yega for di hulanda pa e unidad canino di husticia cu ta ocupa su mes cu e  Instituto Coreccional  (KIA).  E vehiculonan aki lo juda e unidad aki den e trabou cu nan ta haci diariamente entre otro e guia di preso  cu mester presenta na corte di husticia.

Sr. Dick Van Leenen  cu ta hefe di e unidad canino di KIA  a remarca di ta contento di por a ricibi 5 unidad volkswagen transporter color shinishi y 5 color preto full equipa pa transporta cachonan di husticia, remplasando asina  algun di e unidadnan  cu no ta den e estado mas optimo  pa opera aden.

Tin un cooperacion hopi extenso cu e coleganan den reino hulandes,  cu ta haci posibel intercambio di material y tambe sostene otro na momento cu esaki ta necesario.

E Titular di husticia ta satisfecho  di por mira e fruto di e tempo inverti den e cumbre hudicial entre e minister nan di husticia di reino cu ta dunando su fruto, mirando cu algun tempo atras a haya varios unidad nobo pa Cuerpo Especial Arubano (CEA)  por cumpli cu e  transporte di preso,  awor ta turno di e unidad canino di husticia encarga di KIA  y pronto nos institucion coreccional (KIA) lo ricibi material nobo.

Unidad Canino di KIA ta huramenta y por ehecuta nan trabao den y p’afor di e murayanan di KIA

Recientemente e Unidad Canino (K9) di KIA a huramenta como buitengewoon agent dunando e team special mas peso. Cu e acto aki awor e team canino lo por actua den e murayanan y p’afor di e murayanan di Aruba su insituto correccional. E team aki a wordo forma tres aña pasa pero solamente por a actua den KIA, centro orthopedagogico y centro Colorado mirando cu nan no tabata tin e educacion y training oficial pa por actua p’afo di e murayanan di KIA. Mirando con efectivo e unidad aki ta pa controla y mantene ordo a dicidi di formalisa nan status y despues di a sigui e trainingnan necesario awor nan por expande nan trabaonan sosteniendo diferente departamentonan cu ta resorta bao di husticia.

“Awe mainta nos tin cerca nos e unidad K9 di KIA pa asina nan por huramenta como buitengewoon agent van politie. Esaki ta nifica cu nan tin un posicion special como ambtenaar cu ta duna nan e posibilidad di — banda di e trabaonan di control cu nan ta haci caba — nan por traha procesverbaal tambe na momento cu nan constata cierto cosnan cu no ta na ordo,” Minister di Husitica, Arthur Dowers ta elabora. E ta sigui splica cu tin biaha nan ta listra den prison y hopi biaha ta constata cu tin productonan ilegal den e celnan, manera droga, anto e ora nan mes por traha e procesverbaalnan pa esaki.

E unidad aki a sigui un educacion loke nifica cu nan a prepara y train… “y nan tur a logra pasa esaki exitosamente y p’esey awe nan por huramenta pa asina nan por haci e trabao den un forma mas profesional,” e mandatario ta agrega.

E  ta un team cu a crece den e ultimo añanan y desaroya den prison. “E trabao cu nan a bin ta haciendo ta di un nivel hopi halto y mi ta hopi contento cu awe nos por integra e team profesional aki den e sistema di husticia,” Minister Dowers ta bisa.
E unidad K9 ta lidera pa un agente policial cu ya tin su rango y no mester a huramente hunto cu e otronan. E team ta forma parti di e riot team di prison. “Nos tin un riot team bon prepara cu e trainingnan necesario y nos ta evaluando si por bin cu gruponan nobo,” Minister ta duna di conoce. E ta agrega cu tur hende cu ta traha den prison ta drenta un proceso di training.

E ta sigui splica cu aña pasa a introduci un plan di training pa tur cu ta traha na prison. E siman aki nan ta cuminsa cu diferente training y na luna di maart ta premira cu lo finalisa e proceso di busca mas hende pa traha na KIA unda cu lo recluta personal nobo pa bay traha den prison. “Nan lo haya e educacion y training pa asina nan por drenta e ramo di trabao aki. Lo mira un par di cambio den e training unda ta cuminsa cu un educacion basico pa despues mira si ta bay direccion di seguridad of traha den prison mes y tambe lo duna bijscholing pa esnan cu tin un tempo caba ta trahando den prison,” e mandatario ta elabora.

E cachonan aki tin diferente funcion. Tin cacho cu ta bay den prison pa busca droga, tin cacho cu ta busca celular y tin cacho cu ta patruya… “nan ta mas pa na momento cu tin un riot unda bo ta uza nan mas. No ta asina cu e cacho ta drenta prison y haci’bo nada. Si abo mes lanta contra e autoridad den prison bo por haya’bo confronta cu e cachonan aki. Pero e otro cachonan cu ta traha regularmente den prison ta esunnan cu ta busca droga y celular den e celnan como tambe cerca e bishitante y te hasta e personal. E ta un agregacion hopi valioso pa reduci e riesgonan y evita contrabando den prison.”

Director di KIA, sr. RoccoTjong ta uni su mes na e sentimentonan di Minister di Husitica y ta bisa cu fuera di por mira personal di KIA dal un stap dilanti den nan carera e unidad K9 ta uno hopi importante pa Aruba su instituto correcional. “Esaki pensando riba proyectonan p’afo pa detenidonan unda e team aki por tene bista mehor riba e detenidonan door di e team aki,” e ta agrega.
E ta sigui bisa cu e ta haci posibel pa KIA como organisacion por ta mas dinamico y asina haci’e posibel pa detenidonan por realmente integra bek den comunidad den un bon forma.
“K9 y IBT (interne bijstands team) ta dos unidadnan cu practicamente den un prison lo no por opera efectivamente sin nan awendia y p’esey ta wak e unidadnan aki den tur prisonnan rond mundo. E ta percura pa un prison ta mas sigur pa e detenidonan como tambe e personal,” e ta splica.
Tin hopi desaroyonan na caminda e director di KIA ta bisa. “Aña pasa nos a cera cu un congreso presentando un plan di maneho nobo. Loke a tuma lugar awe ta parti di e plan y door di e huramentacion ta bay haci posibel cu e aña aki por cuminsa realmente cu proyectonan p’afo y sigui cu inovacion den prison,” e ta bisa determina.
Sr. Dick van Leenen tambe ta sinti cu e dia aki ta uno hopi special pa e sistema hudicial mirando cu un team hopi special awor ta forma un parti integral.  “Un team cu ta activo tres aña caba den instituto KIA, centro orthopedagogico y Centro Colorado y nan a traha  a base di e reglanan di cas,” e ta splica.
Pa haci posibel cu e team aki por funciona p’afo di e insitutonan aki nan a sigui e educacion di buitengewoon agent van politie y awe nan ta keda huramenta. E team ya caba ta haciendo un bon trabao den e murayanan di KIA. “E siman cu a pasa a revisa aña 2016 y por ripara cu na 2015 e cachonan a drenta den accion 109 biaha y den 2016 e cifra aki tabata 111 biaha pa controla y pone ordo, den razia y transporte. Pero tur esaki den e murayanan pasobra cu nan no por a traha p’afo di e murayanan di KIA. Danki na e acto di awe nan por fungi p’afo y por haci transporte p’afo,” Dick van Leenen ta bisa.
E ta conclui bisando cu tur hende sa e situacion den KIA y mester remarca cu hopi a wordo poni bao control den e ultimo añanan danki na e team aki. “Na momento cu tin desorden mas ainda. For di su comienso e team aki ta bin den accion 24 ora pa dia, henter aña na disposicion y cu nan sosten hopi calamidad a wordo evita y awor por transporta p’afo di e murayanan. E team aki sigur a percura pa paz y ordo den KIA.”

Minister Dowers a entrega Decreto Ministerial na 30 miembro di Interne Bijstands Team

20161117-minjus-ibt-01

Diahuebs mainta na Centro di entrenamento na Balashi,  a tuma lugar entrega di envelopnan cu e Decreto Ministerial  na miembronan di e “Interne Bijstands Team”.

E decreto aki ta regla e compensacion pa 30 miembronan aki  di e team aki. Presente na e ocasion  aki, tabata  e directornan di: Instituto Correcional Aruba (KIA)  sr. Rocco Tjon, e Director di Cuerpo Especial Arubano (CEA) sr. Ronny Geerman  y e lider di team aki  sr. Dick van Leenen.  E decreto aki mester a  keda regla hopi tempo atras caba, sinembargo “algo a bai fout”cu a percura pa e tardansa di esaki, sinembargo Minister Dowers ta contento cu esaki a keda concretisa  y cu awe e  miembronan di e unidad aki por ricibinan compensacion aki.   E titular di husticia a jama e miembronan di e team aki  danki pa a acepta e reto aki mirando e situacion di  e prizon den cual nan mester labora na momento  cu  nan mester enfrenta e prezonan.  E mandatario a termina gradiciendo cada un pa nan dedicacion, pasobra sin nan no tin un IBT Team.

 

Presentacion di IBT ( Interne Bijstand Team di KIA ) K9 pa muchanan keda leu di droga un exito rotundo

DSC_2370

Keda leu for di droga. No cay den gara di hendenan cu ta uza bo pa distribui droga, pasobra nan no ta bin yuda bo ora polis gara bo. No cay den tentacion pa bende droga. Ta consciente di e peliger y consecuencianan di tur locual por pasa si bo bay den caminda di droga. Esakinan ta algun di remarcanan y mensahenan cu un grupo di hoben a ricibi for di e miembronan di Unidad di K9 di KIA durante di un presentacion hopi impactante cu a tuma luga e siman aki na Centro di Bario Dakota.

Minister di Husticia, mr. Drs. Arthur Dowers tambe a presencia e demostracion, y tabata satisfecho pa wak e interes grandi di parti di e miembronan di e ekipo di futbol di SV Dakota, hobennan di e bario, y e muchanan cu ta forma parti di e proyecto “Bo Futuro ta den Bo Man”. A conta ta tambe cu presencia di algun di e mayornan, kende tabata hopi interes pa cu e topico di prevencion di droga, y con pa haci nan yiunan mas fuerte contra e mundo di droga.

E miembronan di K9 a duna demostracionnan con e cachonan cu a ricibi training special y specifico ta detecta droga, y a subraya durante di henter e presentacion con importante e ta pa hoben y grandi keda leu for di droga.

Minister Dowers a remarca cu tabatin hopi pregunta di parti di e hobennan, cual ta algo hopi importante, y interesante. Nan tabata masha interesa pa siña mas, y sa con nan por preveni di haya nan mes involucra den transportacion, benta y uzo di droga, como cu cada biaha mas y mas nan mes ta wak cu e ta un forma di biba cu ta peligroso y no beneficioso.

E mandatario a bisa cu den e parti di combatimento di droga na Aruba en general e “listramento preventivo” ta dunando bon resultado. Na momento cu anuncia un accion sea e personanan cu ta bende, uzo of distribui droga ta keda for di caya; of si nan mes dicidi di sali toch, polis ta gara nan y asina ta kita droga for di caya.

Hopi bes ora ta haya droga ta habri caminda pa otro investigacionnan, e minister a bisa.

Ademas di droga, Minister Dowers a remarca, por a mira durante di e ultimo accion cu despues cu a haya un persona cu droga a haya ordo di huiszoeking (listramento di cas) tambe y aki a haya droga y armanan di candela. Asina a logra kita mas arma for di caya tambe.

Durante di e ultimo accion tambe a haya sa di un hoben di 15 aña cu tabata den cas y tabatin relacion cu hendenan mayor di edad, y polis a haya interveni den e caso aki tambe. Esaki tabata un situacion delicado, y tabata un coincidencia cu nan a topa cu e hoben den e situacion aki, tur cos danki na “preventief fouilleren pa droga”.

Ora cu haya un persona cu droga, y particularmente un hoben, e risiconan di keda deteni y cera den KIA ta keda di e hoben, y e consecuencianan pa su curpa y mentalmente ta hopi fuerte, segun Minister Dowers. Esaki ta algo cu mester preveni semper, y e prevencion ta cuminsa cu e informacion corecto con pa para mas fuerte, y pues ta mas “weerbaar” pa e mundo di droga.