Unidad Canino hudicial di KIA a ricibi 10 unidad di transporte for di hulanda.

Recientemente Minister Arthur Dowers a bishita e Centro di entrenamento di husticia na Balashi pa ricibi diferente vehiculo cu a yega for di hulanda pa e unidad canino di husticia cu ta ocupa su mes cu e  Instituto Coreccional  (KIA).  E vehiculonan aki lo juda e unidad aki den e trabou cu nan ta haci diariamente entre otro e guia di preso  cu mester presenta na corte di husticia.

Sr. Dick Van Leenen  cu ta hefe di e unidad canino di KIA  a remarca di ta contento di por a ricibi 5 unidad volkswagen transporter color shinishi y 5 color preto full equipa pa transporta cachonan di husticia, remplasando asina  algun di e unidadnan  cu no ta den e estado mas optimo  pa opera aden.

Tin un cooperacion hopi extenso cu e coleganan den reino hulandes,  cu ta haci posibel intercambio di material y tambe sostene otro na momento cu esaki ta necesario.

E Titular di husticia ta satisfecho  di por mira e fruto di e tempo inverti den e cumbre hudicial entre e minister nan di husticia di reino cu ta dunando su fruto, mirando cu algun tempo atras a haya varios unidad nobo pa Cuerpo Especial Arubano (CEA)  por cumpli cu e  transporte di preso,  awor ta turno di e unidad canino di husticia encarga di KIA  y pronto nos institucion coreccional (KIA) lo ricibi material nobo.

Minister Arthur Dowers contento cu e camaranan nobo di KIA


Nos ta sumamente contento con e trabounan a bay pa cu instalacion di camaranan nobo den K.I.A., Minister Dowers a cuminsa bisa na invitadonan special na Instituto Coreccional Aruba, conoci como K.I.A. Esaki despues cu e compania local SafeCom a haci entrega oficialmente di e proyecto aki.
Segun e mandatario cu e la keda impresiona con professional e equipo di SafeCom a traha. Esaki pasobra tin hopi protocol cu mester cumpli cu ne den un instituto manera K.I.A. y mas ainda ora ta trata di laga otro personanan drenta den e edificio aki cu no ta trahador y pa nan haci un trabou di tal magnitud, ta di admira e seriedad cu e trahadornan aki tabata tin. Na ningun momento a ricibi niun clase di keho di e trahadornan aki y na momento cu un partner externo bin traha cu husticia, e mester ta uno di confiansa complete y no tin niun clase di duda riba e integridad di e compania SafCom, Minister Dowers a enfatisa bisando aserca cu e ta spera di por sigui traha cu e compania aki tambe den futuro.E camaranan sofistica aki lo garantisa e seguridad , di no unicamente di e trahadornan como e bishitantenan, pero sigur tambe di e presonan mes. “Nos tarea como ministerio di husticia ta pa detene hende y ora nan bin K.I.A., nos mester brindanan e seguridad tambe. Awor si un preso dicidi di viola ley, e video lo yuda den e proceso penal tambe contra di esun cu ta kere di por burla di nos systema hudicial”, Minister Dowers a bisa.

Minister Dowers contento con e proceso di renovacion den KIA ta canando


Durante e bishita recien di Minister di Husticia Arthur Dowers na e Instituto Correccional (KIA), a pasa na e seccion di e instuto caminda e detenidonan ta wardando riba nan castigo, conoci como “Huis van Bewaring”.
A conclui e renobacion di e huis van bewaring, faltando algun detaye ainda den e area di recreo caminda cu e personal di e instituto lo por guia e detenidonan hopi mas organisa nan momento di ricibi diferente entrenamento. Esaki lo bai pone cu e Instituto ta cumpli aun mas ainda cu e exigencianan di e commision contra tortura y maltrato di detenidonan (CPT), cu un di nan exigencianan ta cu un detenido mester tin tanto recreo como educacion y formacion durante e periodo cu nan ta encarcela den e instituto aki. E seccion di straf, cu algun tempo atras sufri daño di candela, cu ta den e proceso di renovacion ta bayendo den bon direccion. Na momento cu e renovacion aki keda completa den algun siman, lo por haci uso di 16 cel adicional den e seccion aki. Tambe e titular di husticia a tuma nota cu algun prisonero, bou guia di e contratista ta haciendo e trabounan di renovacion den e instituto aki. Minster Dowers ta di opionion cu esaki ta un Adelanto hopi grandi na momento cu e hobennan encarcela ta siña un ofishi, lo por bandona e institucion aki cu e conocemente adkeri y por bai eherce e ofishi aki den sociedad.

Minister Dowers a bay mira desaroyo Proyecto “Camera Kamer” pa KIA

Ministerio di Husticia tin diferente Proyecto y programa andando. Un di nan ta e “Camera Room”cu ta wordo construi na Instituto Coreccional KIA, na Santo  Patia. Mirando cu e Proyecto ta basta avansa, e mandatario a bay mira con e plannan ta avansando.

E mandatario a wordo informa cu e Proyecto di camera pa KIA ta den e fase final caba, pues ta canando segun e programacion. Durante e bishita e mandatario a sera conoci cu e personanan cu lo bai traha den e “Camera Room”  cu a cuminsa ricibi nan entrenamento for di e compania local Safecom. “Mi tabata presente na inicio di e proyecto y awe mi tin cu bisa cu mi ta sumamente contento cu nos a logra implementa e proyecto. Tin algun detaye chikito cu falta pa loke ta e software. Despues di esaki ta keda solamente entrega di e proyecto,”Minister di Husticia Arthur Dowers a comenta.

E mandatario ta considera esaki un joya di proyecto cu lo bay contribui cu e institucion aki ta aumenta e aspecto di siguridad, cu ta masha importante, pero ta crea un miho proceso di integridad. E “Camera Room” ta permiti autoridadnan concerni pa haci un miho investigacion denter di e instituto penal ora cu algo bay robez. Minister Dowers ta manda palabra di felicitacion pa personal di KIA y Aruba cu e logro aki den mehoracion di cuido di e prison di Aruba. Di e forma aki, e personal di KIA ta haya un otro instrumento pa por ehecuta nan trabou di un miho forma

 

Minister Dowers a entrega promocion na empleadonan di KIA

Diabierna mainta na Instituto Correccional  (KIA) a tuma lugar entrega di varios decreto gubernamental  den algun caso acompaña pa un insignia nobo  indicando e promocion den rango  di algun trahador di e institucion. Minister di Husticia Arthur Dowers a felicita tur cu a ricibi nan promocion y a remarca cu e la tuma nota di e adelanto tumando lugar den varios area den e institucion aki. E mandatario ta spera cu e adelanto aki continua mirando e condicionnan di trabou cu no tur ora ta esun di mas facil, sinembargo nan ta cumpli cu nan labor y awe esaki ta resulta den un promocion pa nan.  E titular a haci un apelacion na e empleadonan presente, pa  sigui haci nan trabou y tambe sigui motiva e otro ploegnan laborando apesar di e scarsedad di trahador  cu tin actualmente. Minister Dowers a finalisa felicitando tur cu a ricibi promocion y a informa cu ta trahando duro pa recluta personal nobo y ta spera cu e grupo aki lo por guia esakinan di mes manera cu nan a bin ta labora durante ultimo añanan.

Unidad Canino di KIA ta huramenta y por ehecuta nan trabao den y p’afor di e murayanan di KIA

Recientemente e Unidad Canino (K9) di KIA a huramenta como buitengewoon agent dunando e team special mas peso. Cu e acto aki awor e team canino lo por actua den e murayanan y p’afor di e murayanan di Aruba su insituto correccional. E team aki a wordo forma tres aña pasa pero solamente por a actua den KIA, centro orthopedagogico y centro Colorado mirando cu nan no tabata tin e educacion y training oficial pa por actua p’afo di e murayanan di KIA. Mirando con efectivo e unidad aki ta pa controla y mantene ordo a dicidi di formalisa nan status y despues di a sigui e trainingnan necesario awor nan por expande nan trabaonan sosteniendo diferente departamentonan cu ta resorta bao di husticia.

“Awe mainta nos tin cerca nos e unidad K9 di KIA pa asina nan por huramenta como buitengewoon agent van politie. Esaki ta nifica cu nan tin un posicion special como ambtenaar cu ta duna nan e posibilidad di — banda di e trabaonan di control cu nan ta haci caba — nan por traha procesverbaal tambe na momento cu nan constata cierto cosnan cu no ta na ordo,” Minister di Husitica, Arthur Dowers ta elabora. E ta sigui splica cu tin biaha nan ta listra den prison y hopi biaha ta constata cu tin productonan ilegal den e celnan, manera droga, anto e ora nan mes por traha e procesverbaalnan pa esaki.

E unidad aki a sigui un educacion loke nifica cu nan a prepara y train… “y nan tur a logra pasa esaki exitosamente y p’esey awe nan por huramenta pa asina nan por haci e trabao den un forma mas profesional,” e mandatario ta agrega.

E  ta un team cu a crece den e ultimo añanan y desaroya den prison. “E trabao cu nan a bin ta haciendo ta di un nivel hopi halto y mi ta hopi contento cu awe nos por integra e team profesional aki den e sistema di husticia,” Minister Dowers ta bisa.
E unidad K9 ta lidera pa un agente policial cu ya tin su rango y no mester a huramente hunto cu e otronan. E team ta forma parti di e riot team di prison. “Nos tin un riot team bon prepara cu e trainingnan necesario y nos ta evaluando si por bin cu gruponan nobo,” Minister ta duna di conoce. E ta agrega cu tur hende cu ta traha den prison ta drenta un proceso di training.

E ta sigui splica cu aña pasa a introduci un plan di training pa tur cu ta traha na prison. E siman aki nan ta cuminsa cu diferente training y na luna di maart ta premira cu lo finalisa e proceso di busca mas hende pa traha na KIA unda cu lo recluta personal nobo pa bay traha den prison. “Nan lo haya e educacion y training pa asina nan por drenta e ramo di trabao aki. Lo mira un par di cambio den e training unda ta cuminsa cu un educacion basico pa despues mira si ta bay direccion di seguridad of traha den prison mes y tambe lo duna bijscholing pa esnan cu tin un tempo caba ta trahando den prison,” e mandatario ta elabora.

E cachonan aki tin diferente funcion. Tin cacho cu ta bay den prison pa busca droga, tin cacho cu ta busca celular y tin cacho cu ta patruya… “nan ta mas pa na momento cu tin un riot unda bo ta uza nan mas. No ta asina cu e cacho ta drenta prison y haci’bo nada. Si abo mes lanta contra e autoridad den prison bo por haya’bo confronta cu e cachonan aki. Pero e otro cachonan cu ta traha regularmente den prison ta esunnan cu ta busca droga y celular den e celnan como tambe cerca e bishitante y te hasta e personal. E ta un agregacion hopi valioso pa reduci e riesgonan y evita contrabando den prison.”

Director di KIA, sr. RoccoTjong ta uni su mes na e sentimentonan di Minister di Husitica y ta bisa cu fuera di por mira personal di KIA dal un stap dilanti den nan carera e unidad K9 ta uno hopi importante pa Aruba su instituto correcional. “Esaki pensando riba proyectonan p’afo pa detenidonan unda e team aki por tene bista mehor riba e detenidonan door di e team aki,” e ta agrega.
E ta sigui bisa cu e ta haci posibel pa KIA como organisacion por ta mas dinamico y asina haci’e posibel pa detenidonan por realmente integra bek den comunidad den un bon forma.
“K9 y IBT (interne bijstands team) ta dos unidadnan cu practicamente den un prison lo no por opera efectivamente sin nan awendia y p’esey ta wak e unidadnan aki den tur prisonnan rond mundo. E ta percura pa un prison ta mas sigur pa e detenidonan como tambe e personal,” e ta splica.
Tin hopi desaroyonan na caminda e director di KIA ta bisa. “Aña pasa nos a cera cu un congreso presentando un plan di maneho nobo. Loke a tuma lugar awe ta parti di e plan y door di e huramentacion ta bay haci posibel cu e aña aki por cuminsa realmente cu proyectonan p’afo y sigui cu inovacion den prison,” e ta bisa determina.
Sr. Dick van Leenen tambe ta sinti cu e dia aki ta uno hopi special pa e sistema hudicial mirando cu un team hopi special awor ta forma un parti integral.  “Un team cu ta activo tres aña caba den instituto KIA, centro orthopedagogico y Centro Colorado y nan a traha  a base di e reglanan di cas,” e ta splica.
Pa haci posibel cu e team aki por funciona p’afo di e insitutonan aki nan a sigui e educacion di buitengewoon agent van politie y awe nan ta keda huramenta. E team ya caba ta haciendo un bon trabao den e murayanan di KIA. “E siman cu a pasa a revisa aña 2016 y por ripara cu na 2015 e cachonan a drenta den accion 109 biaha y den 2016 e cifra aki tabata 111 biaha pa controla y pone ordo, den razia y transporte. Pero tur esaki den e murayanan pasobra cu nan no por a traha p’afo di e murayanan di KIA. Danki na e acto di awe nan por fungi p’afo y por haci transporte p’afo,” Dick van Leenen ta bisa.
E ta conclui bisando cu tur hende sa e situacion den KIA y mester remarca cu hopi a wordo poni bao control den e ultimo añanan danki na e team aki. “Na momento cu tin desorden mas ainda. For di su comienso e team aki ta bin den accion 24 ora pa dia, henter aña na disposicion y cu nan sosten hopi calamidad a wordo evita y awor por transporta p’afo di e murayanan. E team aki sigur a percura pa paz y ordo den KIA.”

Minister Dowers a entrega Decreto Ministerial na 30 miembro di Interne Bijstands Team

20161117-minjus-ibt-01

Diahuebs mainta na Centro di entrenamento na Balashi,  a tuma lugar entrega di envelopnan cu e Decreto Ministerial  na miembronan di e “Interne Bijstands Team”.

E decreto aki ta regla e compensacion pa 30 miembronan aki  di e team aki. Presente na e ocasion  aki, tabata  e directornan di: Instituto Correcional Aruba (KIA)  sr. Rocco Tjon, e Director di Cuerpo Especial Arubano (CEA) sr. Ronny Geerman  y e lider di team aki  sr. Dick van Leenen.  E decreto aki mester a  keda regla hopi tempo atras caba, sinembargo “algo a bai fout”cu a percura pa e tardansa di esaki, sinembargo Minister Dowers ta contento cu esaki a keda concretisa  y cu awe e  miembronan di e unidad aki por ricibinan compensacion aki.   E titular di husticia a jama e miembronan di e team aki  danki pa a acepta e reto aki mirando e situacion di  e prizon den cual nan mester labora na momento  cu  nan mester enfrenta e prezonan.  E mandatario a termina gradiciendo cada un pa nan dedicacion, pasobra sin nan no tin un IBT Team.

 

Ta pidi pa comunidad duna su cooperacion den desaroyo di atraconan cu ta tuma luga

dsc_8399

Diabierna anochi dos intento di atraco a fracasa. A bay na dos diferente luga. E camaranan di siguridad toch ta hunga un rol pa turistanan or cana tambe. Minister di Dowers ta na altura di e situacionnan. Diabierna anochi e tabata tin contacto cu Cuerpo Policial y prensa pa loke ta e desaroyo aki.

A wordo informa mesora cu tabata tin algun persona cu tabata purba di comete atraco y tin cu bisa cu Danki Dios nan no a logra. Sinembargo tabata tin hopi polis riba caya, caminda cu nan a mobilisa y a haya hopi informacion riba e intento di atraconan aki. Por a mira ultimo tempo cu esnan ta core riesgo grandi tumando hopi medida, door di instala bon camaranan, tumando medidanan di precaucion ora cu ta cera mas laat, mirando cu tin negoshi cu ta keda te laat habri. Den mundo cu nos ta biba awe sa cu ta core riesgo adicional pa haci esaki. A logra diabierna pa haya informacion basta bon cu ta buta cu por sigui cu e investigacion. Ta spera tambe si tin cualkier persona den comunidad cu tin informacion adicional pa por informa esaki na comunidad tambe. Diasabra mainta e minister a haci un bishita cerca algun persona cu tabata victima di un intento di atraco dos siman pasa a Sero Blanco. A haya chens a combersa ampliamente riba e situacion y con e ta sinti su mes awe. Toch e ta keda un situacion fastioso y e persona aki ta basta traumatisa pa e hecho cu personanan a purba di atrak’e. Nan no a logra si, den e caso aki tampoco. Esey ta e caso caminda cu a bay cu un arma di hunga, pero e persona ta splica y logicamente ta asina cu ora cu nan presenta riba bo cu e arma aki di hunga, bo no por mira cu e no ta mira cu no ta un arma di berdad y ta buta cu ta drenta den hopi panico. E persona ta sinti cu esnan cu ta comete tipo di cosnan aki y principalmente esnan cu ta responsabel pa nan, no sa e daño cu e ta haci na e persona y comunidad y hasta a expresa esaki na e minister, caminda cu e ta sinti’e fastioso y a mustra cu ta hendenan di e mesun bario, caminda cu e intento di atraco aki a tuma luga y cu e ta mira hopi biaha ta circula den su bario, pasobra nan ta biba eybanda y tin poco control di esnan cu ta biba den bario mes. E minister ta spera un biaha mas, haciendo un apelacion na prensa y mayor cu ta responsabel pa e hobennan aki, cu ta guia nan of tin e responsabilidad pa guia nan, pa mustranan riba e hecho cu no solamente tuma un riesgo grandi pa nan mes di perde tambe un parti grandi di nan futuro, pero tambe cu nan ta causando hopi dolor, hopi daño na hende y esaki ta limita tambe pa hendenan cu kier saca un man, sea duna nan trabao, etc. por bira menos.

E lucha cu ta hibando contra di esnan cu ta purba di comete atraco of cu ta haci daño ta sigui hopi fuerte. Cuerpo Policial tin hopi hende na e momento aki na disposicion pa asina haci investigacionnan y tambe pa ta riba caya pa loke ta e aspecto preventivo. Sinembargo mester di e input di henter comunidad. Lo haci un apelacion dentro di poco. Tambe na henter e comunidad na e forma mas structura, duna informacion na Cuerpo Policial y tambe na esnan cu por saca un man pa loke ta e aspecto di informacionnan cu por yuda na prevencion, pa nan tambe coopera na esaki. Ta realisa cu e trabaonan cu polis ta haciendo den departamento di husticia ta duna resultado. Ta realisa tambe cu esaki cada biaha ta bira mas miho. Sinembargo e trabao mas importante na final di dia toch ta, preveni cu e hobennan aki ta yega asina leu. Tin un parti di crimen cu ta tuma luga di personanan cu ta bin for di nos pais, no por controla, pero sigur e muchanan cu ta crece y ta mira na edad di 10, 11 of 12 aña, ta dispuesto pa atraca hende y haci daño, ta un grupo por haya control riba dje. Mester haci mas esfuerso, no solamente husticia, pero otro caminda pa por percura pa e muchanan aki no yega asina leu, segun minister Dowers.

Minister Dowers hopi optimista cu reorganisacion di KIA lo trece mas eficiencia

DSC_8132

Por constata cu hopi di e trabounan cu ta wordo haci den Instituto Penitenciario di KIA ta wordo realisa door di e propio presonan. Esaki, Minister di Husticia Arthur Dowers a bisa, ta parti di e reorganisacion cu ta tumando luga eyden.

Minister Dowers a splica cu su Ministerio no tabatin fondo disponibel den e presupuesto di Husticia pa haci e trabounan cu ta tumando luga den KIA. Pero ta danki na e bon trabou cu ta haci den husticia mes a pone cu a logra haya fondonan, di confiscacion, pa wordo uza den e instituto. E proyecto di camera den prizon, a wordo financia, como ultimo proyecto, door di FDA. Hopi di esnan cu a critica e proyecto di camera pa KIA, e mandatario a bisa, no ta compronde e escencia y importancia di siguridad den KIA. Pa por haci e trabou debidamente, e infrastructura mester ta bon, “cual pa hopi aña caba no tabata optima cerca nos”. E siguridad mester hopi bon pero no tabatin e hermentnan pa sigura esaki. Ora cu logra haya e hermentnan, esnan cu ta traha den hospital por haci nan trabou den forma mas trankil y e prizoneronan lo realisa cu e chensnan ta wordo atrapa ta hopi grandi. A pidi gerencia di KIA pa percura cu tur hende cu comete un acto contra ley, menasa of agredi, haci denuncia pa haya castigo necesario. Niun hende por pensa cu nan ta drenta KIA, haci daño y sali sin castigo, ta ekiboca. Asina tin hende cu a wordo manda Hulanda pa sinta nan castigo, pasobra a viola reglanan di KIA y a causa daño na e instituto. Pesey awor regla estricto ta cu mester respeta trahadonan y e edificio. Si e preso kier sali como un miho persona di prizon, ta haya e chens aki pero cu respet.

 

Trabaonan di mantencion na KIA ta den su fase preparatorio

DSC_9032

A cuminsa cu e trabaonan den KIA na e momentonan aki pa loke ta e dañonan haci mas cu un biaha. Segun Minister di Husticia, Arthur Dowers, a cuminsa cu e fase preparatorio caminda cu ta saca tur loke a daña como consecuencia di e candela y ta spera cu dentro di algun siman por mira toch un remodelacion di e departamento aki.
E candela tabata tin efecto riba e sistema di alarma, e sistema di coriente caminda cu tin cu haci inversionnan mas grandi cu lo tabata tin cu haci si simplemente lo a renoba. E trabaonan a cuminsa y ta dunando indicacion cu dentro di algun siman por haci uzo bek na e departamento aki, pa trece alivio pa e trahado y tambe pa e prezo tambe. Lo bay tin reglanan nobo pa atende cu asunto di candela. Segun cu ta caba un fase, lo bay bin cu e rekisitonan nobo pa loke ta e prizon.

Reubicacion
Awor aki tur hende cu a wordo movi, ta na warda di polis. Ta berdad asina ey cu ta mas comodo den un prizon, pasobra tin mas luga zo y zo. Tin caminda cu por lucht mas trankil. Segun e minister tin mas actividad den prizon compara cu warda di polis. Esnan cu a contribui cu e kimamento di e luga, ta sinti e consecuencia di esaki. Sin embargo no por tene un hende hopi largo den warda di polis, pasobra e condicionnan no ta esun di mas adecuado y por ta en pugna cu reglanan di CPT tambe.
Mantencion E luga su condicion ta berdad malo. Un di e cosnan importante ta cu tabata tin personanan trahando riba algun idea, un remodelacion mas grandi di prizon y e parti nobo di prizon. Pa falta di fondo tur esey a pasa. Ta spera cu pasamento di ley aki por haya tiki rosea pa por paga pa un parti di loke a wordo haci caba y dunanan e posibilidad pa por presenta algun plan cu por bay uza den e remodelacion di prizon pa futuro. Hopi cos ta depende riba e parti financiero. Husticia a coopera cu tur ministerio y a bezuinig hunto cu tur hende. Sinembargo a yega e limite cu no por haci’e mas y ta contento tambe cu cooperacion pa yega na algun fondo adicional, pero cu no ta fondo di husticia of gobierno regular. Ta fondonan cu ta bin di actividadnan criminal. Sinembargo parti di e fondonan regular tambe tin cu bay atende cune.