Luznan den Bario ta hisa e nivel di bida di e ciudadano

Instalacion di luznan den bario no ta un maneho ad hoc, pero ta un forma bon pensa cu por brinda e ciudadano mas siguridad den su bida diario. Esaki ta loke Minister di Husticia Arthur Dowers a bisa riba e tema aki.Parti di maneho di Gabinete Mike Eman II ta dirigi riba aumenta siguridad den tur bario. “Ora nos ta papia di siguridad , no ta papia unicamente di reduci e riesgo cu un persona ta comete un crimen contra otro. Pero tambe den esfera preventivo, unda cu por limita of reduci e chens cu un persona por haya e oportunidad di comete crimen. Esaki ta nifica cu mester inverti tambe den infrastructura den barionan pa crea barionan mas sigur. Tambe luznan den Bario ta hisa e nivel di bida di e ciudadano,” Minister Dowers a bisa .

El a splica cu un di e instrumentonan pa yuda yega na e meta ariba menciona ta luznan den bario. Ora cu tin mas claridad den e barionan, e ta menos facil cu delincuentenan por sconde den areanan pa planea delitonan. “E cambionan tecnologico haci a haci un contribucion na reduci gastonan.” Den e caso di introduccion di luz LED pa iluminacion di caya, a trece un reduccion di gasto pa Gobierno y esaki no ta faborece ningun hende pero ta inverti esaki pa cumpra mas luz pa e barionan unda tin scuridad.”

E mandatario ta admiti cu ainda tin hopi bario cu falta pa haya iluminacion, pero tin di nan cu tin un infrastructura complica cu mester wordo adapta y esnan concerni ta studiando esaki. Un di e barionan aki ta Seroe Patrishi y ya caba a busca conseho cerca DTI y ELMAR, con pa cambia e sistema di coriente cu actualmente ta core bou tera. Tin varios cambio a wordo haci den e bario pa brinda siguridad, pero ta keda falta e aspecto di mas siguridad. Ta algo cu Gobierno ta trahando riba dje.

E programa Luz den Bario ta un iniciativa cu Prome Minister Mike Eman a cuminsa cune na cuminsamento di 2013, debi na e tantisimo demanda cu tabatin di parti di e ciudadanonan.

Colegio San Nicolaas a conoce 53 % graduado

Durante e anochi di graduadonan di alumnonan di Colegio San Nicolaas, Minister di Husticia mr. drs. Arthur Dowers a hiba palabra. E mandatario kende durante e periodo di 2009 pa 2013

tambe tawata tin e cartera di enseñanza, a cuminsa su discurso diabierna anochi bisando: “Permiti mi cuminsa na felicita tur graduadonan pero tambe tur mayornan presente. Den nan mi ta mira varios caranan hopi familiar y conocir y mi ta hopi content di por tey awenochi pa comparti cu boso nan e momento importante aki. Mi ta manda un pabien na Colegio San Nicolaas, cu a bin ta haci un tremendo trabou, y cu e resultado cu a wordo presenta awe nochi mi ta kere cu merece sigur un fuerte aplauso mirando e porcentahe halto di e graduadonan ta jega na e suma di 53%”. E actual titular di husticia a recorda con durante e periodo di gobernacion di 2009 pa 2013, su persona conhuntamente cu awendia e inspector general di enseñanza, sr. John Hessel, a haci un yamado na entre otro sra. Rumny, meneer Croes y sr. Fingal, cu nan deseo ta, pa haci Colegio San Nicolaas, un scol volwaardig.  E mandatario a recorda con e personanan aki y demas docentenan a mira esaki como algo sumamente positivo y awe nan ta para mira cu gran satisfaction e resultado positivo cu e descicon aki a trece cu ne. Minister Dowers a continua bisando; “maske cu mi ta e minister di Husticia y cu mi ta ocupa mi mes cu esaki henter dia, toch como minister interino di Enseñanza, mi ta sinti mi yama pa a bin awe nochi na e ocacion special aki, pasobra cu mi tin un relacion hopi special cu e scol aki. Loke cu mi ta sinti ta, cu enseñanza ta sumamente importante y na momento cu nos a dicidi di habri e scol aki oficial na San Nicolaas, nos a tuma nota di e alegria di e mayornan”. Por ultimo minister Dowers a dirigi su mes na e graduadonan bisando nan cu awe un caminda nobo a habri pa nan y cu esaki ta un apertura, apenas e comienso. Y titular a sgui bisando cu e ta spera cu e graduadonan haci bon uso di e oportunidad aki pa nan por logra cos nan grandi den bida. “Loke cu mi mes a yega di expresa den pasado tawata, cu na momento cu cosnan positivo tuma lugar, hopi bes nan no ta wordo publica, pasobra noticianan negativo ta haya mas atencion. Pero mi mes lo percura pa haci un yamado na un di e corantnan y tambe websitenan, pa nan publica e bon noticia aki y di e forma aki, nan contribui na duna un noticia sumamente positivo, na nos comunidad. Pasobra awe hopi hoben a gradua bou guia di nan mayornan y tambe docentenan inspira y nan lo percura pa sigui constui y contribui na e desaroyo di e pais aki”, Minister di Husticia, mr. drs. Arthur Dowers a termina bisando.

E ta un contribucion cu Gobierno ta obliga pa duna pueblo

Minister di Husticia Arthur Dowers tabatin e honor di cende e prome luz LED di caya den e bario di Paramira, cu ta keda net patras di stadion di RCA na Solito. Un bario nobo, cu casnan bunita, pero cu no tabatin luz di caya. Algo cu a cambia e siman aki.

Diahuebs anochi Minister Dowers, den presencia di su colega di Infrastructura Benny Sevinger, a cende e luz cu a trece un alegria grandi pa e habitantenan. Aunke cu e bario ta basta bon desaroyo, tin algun aspecto, manera iluminacion di caya cu tabata falta. Gobierno tabata consciente di esaki. E deficiencia den luz di caya ta algun cu a wordo neglisha pa algun decada te ora cu Gabinete Mike Eman I y II a yega pa goberna. Minister Dowers a pasa den e bario aki recientemente y un biaha mas a scucha e habitantenan riba nan preocupacion pa e scuridad den e bario, y a duna nan e bon noticia cu pronto nan lo mira mira cambio den esaki. “E cambio a yega. Nos ta sumamente contento di ta aki,” e mandatario a bisa diahuebs anochi.

Minister Dowers a splica cu na momento cu a bay campaña 4 aña pasa a uza e slogan “ainda falta”, pasobra segun desaroyo tuma luga den un pais cada bes tin cosnan cu mester wordo haci. “Nos ta contento cu awe nos por cumpli cu un bario mas y duna un contribucion di e forma aki na aumento di siguridad y reduccion di riesgonan.” E iluminacion di barionan ta un aspecto hopi importante, y e Gobierno cu e ta forma parti di dje ta kere cu e tin e obligacion pa duna e contribucion aki na e comunidad “cu a sostene nos, pasobra nan a mira cu nos a pone prioridadnan na loke ta importante pa e pueblo.” Pero e mandatario na mesun momento a bisa cu tin hopi cos mas pa haci ainda, den e bario di Paramira y otro barionan.

Durante e proximo siman personal di ELMAR lo ta trahando pa instala luz LED den henter e bario. Mirando e eficiencia di e tipo di luznan aki, nan ta wordo instala cada pasa un palo di luz. Programa Luz den Bario ta algo cu Gabinete Mike Eman a bin ta trahando riba dje for di aña 2012, basa riba peticion di habitantenan di diferente bario pa haya mas iluminacion di caya.

 

Hopi hende no ta compronde e tema di abuso sexual di mucha

Diamars atardi Fundacion Respeta Mi a presenta e tema di Abuso sexual di mucha y Minister di Husticia, Mr. Drs. Arthur Dowers ta contento cu nan a haci esaki. “Ora cu tin discusion ariba abuso sexual y hopi hende no ta compronde e materia y e ta bira hopi bes un discusion emocional sin cu ta compronde kico e complicidad di e materia ta”, Minister Dowers a enfatisa.
Ta mira cu mayoria caso di abuso sexual cu ta tuma den famia, ta haci’e hopi dificil pa atende cun’e y preveni. Esey no ta nifica cu no mester haci mas esfuerso. Loke a demostra por medio di materialnan informativo, nan por yega cerca muchanan, potencial victimanan, pero tambe hendenan cerca di e victimanan cu por tende algo, compronde algo. Papiando por saca for di un victima of un potencial victima for di un situacion fastioso. E ta bon y e mandatario ta haya cu mas di e fundacionnan ta uniendo forsa pa asina combati e fenomeno aki. Na final di dia e fenomenonan aki ta nifica actonan criminal, pero tambe nan ta nifica actonan di violencia contra hende cu tin consecuencianan hopi grave fisicamente y mentalmente pa henter nan bida. Ora cu preveni esaki tin un ganashi caba, pero asina cu algo pasa cu e mucha por drenta den accion lihe y trat’e, dun’e cuido y guia. Pa asina minimalisa e trauma cu a sufri. Minister ta kere cu esaki tin mas balor cu e modo cu hopi biaha hendenan ta reacciona manera aworaki. “Mi ta hopi contento, mi ta felicita fundacionnan cu conhuntamente cu esunnan di departamento di Gobierno pa atende cu e tema asina complica.” E tema di sexualidad ta un tema hopi compleho y hendenan tin otro pensamento na con mester atende cu informacion riba sexualidad.
Tin hende ta bisa ora cu duna muchanan informacion riba sexualidad mas trempan, nan ta bay experimenta y tin hopi teoria. Mester informa muchanan di kico mag y kico no mag y esey ta e base pa ta proteha. “Si bisa e mucha cu hende no mag di mishi bo na cierto caminda. E mucha sa cu na momento cu nan kier haci esey ta algo fout, e por denuncia esey na su mayor of na un hende grandi.” Hopi bes ta e mayor mes ta e abusado pero e ora e mucha por papia cu otro mucha of cu juffrouw na scol, un famia, un wela, un tanta, pa asina ey e mucha por haya ayudo. “Na momento cu haci esey tuma luga tambe tin otro aspectonan masha complica lo bin dilanti. Ta hopi importante pa informa trempan y pa denuncia e cosnan aki pe bienestar di muchanan”, Minister Dowers a remarca. E departamentonan di Ministerio di Husticia t’ey pa proteha muchanan. E departamento di recherche di Polis ta ekipa pa atende cu na momento tin problema, pero esunnan cu ta e prome yama ta e trahadonan riba tereno preventivo, social, educativo. Nan por haci un diferencia hopi mas grandi.

Gobierno di AVP ta cumpli cu su promesa di inverti den Enseñansa

20161123-minjus-opening-arcoiris-02U

n Arco Iris Kleuterschool completamente renoba a habri su portanan bek pa e studiante- y maestronan diaranson mainta den presencia di diferente mandatario, entre otro Minister Arthur Dowers, kende bou di e Gobernacion anterior tabata encarga cu Ministerio di Enseñansa.

Pesey e mandatario tabata presente tambe na e ceremonia di diaranson mainta di cortamento di cinta,  caminda tabata presente tambe actual Minister di Enseñansa, Michelle Hooyboer-Winklaar, Minister Benny Sevinger y Prome Minister Mike Eman.

Minister Dowers den un comentario duna despues di e ceremonia, a cataloga e Proyecto aki como “uno hopi bunita mes”. Alabes e mandatario a bisa cu e proyecto aki ta demostra cu “ora bo inverti den cosnan importante di bo pais esaki ta e resultado”. E mandatario mes a pasa su añanan di scol basico na e edificio aki, ora cu e tabata Princes Margriet School. “Ora cu mi a bira Minister mi a constata cu e edificio tabata bayendo atras. Pero e tempo aya nos a inverti den renobacion di masha hopi scol, pero logicamente den 4 aña no por drecha tur e scolnan.”

Pa drecha un scol ta tuma tempo, e mandatario a splica. El a duna e ehempel di Arco Iris Kleuterschool mes cu a wordo cera 4 aña pasa y a constata tambe cu varios di esnan cu el a cera, a keda cla recientemente. Pa esaki e ta hopi contento, esta cu e bunita resultado pero tambe agradabel pa mira alegria di e muchanan y e maestronan pa e klasnan completamente renoba, cu un bunita speelplaats y gazebo pa nan sinta bou dje. “Esaki ta resultado di e inversion cu nos Gobierno ta haci, e compromiso cu nos tin cu Enseñansa ta wordo demostra tur dia.”El a sigui splica cu tur hende por corda con e situacion tabata, e ta un proceso di hopi aña pa yuda tur scol, pa cual mester sigui inverti. Ora cu caba di renoba tur scol, e prome ta bolbe na turno pa su mantencion. “Gobierno di AVP ta priminti di sigui inverti den Enseñansa y nos ta cumpliendo tur dia cu e promesa cu nos a haci.”

Alumonan di Colegio San Agustin di bishita Minister Dowers

dsc_3682

Dialuna merdia  Keira Teepe y Alexandra  Angela a realisa un  bishita serca Minister di Husticia Arthur Dowers, durante e bishita aki nan a realisa varios pregunta na e titular di husticia,  esaki den cuadro di nan materia hulandes.  E mandatario a contesta tur e preguntanan  y a finalisa motivando cada un pa termina nan estudio y keda leu for di droga.  Minsiter Dowers a gradici nan pa nan bishita y a regala cada un  e “mug” di Fundacion Anti Droga  Aruba (FADA)  cu nan tema di e aña aki You Only Life Once ( YOLO)  y un obsekio  di Ministerio di Husticia.

 

Minister Arthur Dowers orguyoso di e “bon trabou” di Polisnan Prome evento carnavalesco a bay sin ningun eventualidad

whatsapp-image-2016-11-13-at-12-29-17-am

Diabierna anochi a tuma luga e prome evento organisa pa SMAC, cu a bay sin ningun eventualidad. Un di e motibonan probablemente tabata e cantidad di unidadnan di Polis presente, pa garantisa siguridad na tur esunnan den Carnival Village. Na e sitio a nota presencia di unidad di Polisnan uniforma, recherche, Polisnan di K9, Mobiele Eenheid, Polis di Bario, Polisnan di e departamento cu ta atende otorgamento di permiso pa eventonan y asina lo por sigui menciona. Nan tur a sa di percura pa manda un mensahe preventivo pa tur cu a pensa di busca un problema na e evento, cu a pensa nan mes miho y a evita problema cu husticia. Minister mr. Drs. Arthur Dowers a pasa saluda e Polisnan y a felicita tur pa nan “bon trabou”.

Minister Arthur Dowers a duna inicio na temporada di Carnaval 2017

rlq_4740-desktop-resolution
Diabierna ultimo, precisamente riba dia 11 di november 2016, conoci como “11 van de 11”, a tuma luga e evento tradicional pa apertura di nos temporada di carnaval. Contrario na e otro añanan, e biaha aki a reina un ambiente festivo, cu energia positivo y cu hopi smaak pa e temporada yega. Siendo Minister di Cultura interino, Minister Arthur Dowers a presencia e evento y a saluda e publico, cu a ricibi’e den un forma masha cordial. Cu e animo nobo aki, Aruba ta cla pa un temporada di carnaval 63 caminda e celebracion completo lo ta dushi dimes!

Minister Dowers a recorda 30 aña di Jeanice Arends den servicio di Gobierno

dsc_0044

Minister di Husticia Arthur Dowers a sorprende un empleado di  Bureau Ondersteuning Verslavingszorg (BOV),cu ta e Oficina cu ta sostene tur e organisacionnan cu ta traha riba tereno di adiccion, kende a cumpli 30 aña den servicio di Gobierno.

Sra. Janice Arends tabatin dobbel celebracion, ya cu ademas di a cumpli 30 aña di servicio tambe a celebra su fecha natal. E mandatario a expresa di ta contento cu e coleganan di sra. Arends a organisa special p’e. Ta trata aki di un trabou cu no ta facil y mester inverti hopi tempo y energia. Tin biaha tur esfuerso cu bo ta haci no ta duna e resultado desea. Pero por nota cu e team ta keda motiva y apoya tur esnan cu ta traha riba tereno di drugszorgverlening. Pesey mi a bin gradicie pa tur e trabou cu e y su coleganan ta haci den nomber di Gobierno,” Minister Dowers a expresa.

E hubilaria mes tabata hopi feliz loke su coleganan a haci p’e. Na September 1986 el a drenta Scol di Polis unda cu el a pasa den Opleiding 1 y 2 di Polis pa despues cuminsa traha. Na 1996 el a bay Directie Economische Zaken unda cu el a traha como Controlador y a escala posicion pa bira Hoofd Controleur y Hoofd Personeel & Administratie y finalmente el a haya traslado pa Bureau Ondersteuning Verslavigszorg unda cu e ta hefe di personal tambe.

Na e occasion aki tambe tabata presente Steve Gibbs, kende ta hefe di Bureau Ondersteuning Verslavigszorg. Sr. Gibbs a splica cu mirando cu ta 30 aña nan colega a recorda brindando servicio den number di Gobierno, no por a laga e fech special aki pasa sin mas, ya cu alabes ta su cumpleaños tambe. Nan ta hopi contento cu Minister Dowers a haya e chens toch di pasa pa e celebracion special aki.

 

Tragedia di 9/11 a cambia e forma con nos ta mira mundo

dsc_9002

Minister di Husticia mr. drs. Arthur Dowers a compaña colonia Mericano diadomingo ultimo den e ceremonia pa recorda 15 aniversario di e atake terorista na New York, unda cu miles di persona a perde nan bida.

E tabata un ceremonia specialmente pa honra e sobrevivientenan, boluntarionan y Bomberonan kendenan tabata e heroenan den e tragedia aki cu a cambia bida di practicamente tur ciudadano na mundo. Manera a wordo bisa den un di e discurso, e tragedia aki ta e motibo cu awendia pasaheronan mester kita nan sapato pa control na aeropuertonan di mundo.

E mandatario a cuminsa pa pidi aplauso pa Cliff Faltman, kende ta e cerebro tras di organisacion di e evento aki cu a tuma luga na e Monumento di Anne Frank riba Parke Wilhelmina. Sigur niun hende na mundo por lubida e fecha di 11 di September, 2001. “Ami ta corda unda mi tabata para riba 11 di September 2001. Cu excepcion di esnan di 15 aña of menos, no tin hende cu no ta corda e fecha aki. E tabata un momento den historia cu realmente a cambia e forma cu nos ta mira mundo moderno, y el a cambia hopi no solamente den siguridad, pero tambe na control na frontera.”

Minister Dowers a señala den forma diario hopi organisacion ta ocupa nan mes pa mantene tur hende na mundo sigur, un tarea dificil. Pero tambe como Minister di Husticia, el a bisa, encarga cu Bombero y Polis, ta mantene un forma di cooperacion cu organisacionnan rond mundo y ta consciente di con dificil e tarea di siguridad a bira despues di 9/11. “Loke a pasa riba 9/11 a trece hopi tristeza na mundo, especialmente na Merca. Pero tambe el a trece cos bon tambe. El a trece hendenan bon hunto y a uni entidadnan pa yuda haci e mundo aki uno mas miho y sigur. Mi ta kere cu nos tin un chief cu cada ciudadano por bay cas mainta y bolbe bek sigur anochi …. Nos ta spera cu tur hende cu a wordo afecta door di 9/11 ta consciente cu rond mundo tin hopi hende cu amor y pensamento ria e victimanan y nan famia. Nos ta kere cu esaki ta inspiracion pa esnan cu mester sigui den e ramo aki y esnan cu ta bini den futuro pa sigui haci loke e heroenan a haci riba e fecha di 9/11,”Minister Dowers a duna di conoce y a pidi un aplauso tambe pa e Bombero- y Polisnan di Aruba