Hopi hende no ta compronde e tema di abuso sexual di mucha

Diamars atardi Fundacion Respeta Mi a presenta e tema di Abuso sexual di mucha y Minister di Husticia, Mr. Drs. Arthur Dowers ta contento cu nan a haci esaki. “Ora cu tin discusion ariba abuso sexual y hopi hende no ta compronde e materia y e ta bira hopi bes un discusion emocional sin cu ta compronde kico e complicidad di e materia ta”, Minister Dowers a enfatisa.
Ta mira cu mayoria caso di abuso sexual cu ta tuma den famia, ta haci’e hopi dificil pa atende cun’e y preveni. Esey no ta nifica cu no mester haci mas esfuerso. Loke a demostra por medio di materialnan informativo, nan por yega cerca muchanan, potencial victimanan, pero tambe hendenan cerca di e victimanan cu por tende algo, compronde algo. Papiando por saca for di un victima of un potencial victima for di un situacion fastioso. E ta bon y e mandatario ta haya cu mas di e fundacionnan ta uniendo forsa pa asina combati e fenomeno aki. Na final di dia e fenomenonan aki ta nifica actonan criminal, pero tambe nan ta nifica actonan di violencia contra hende cu tin consecuencianan hopi grave fisicamente y mentalmente pa henter nan bida. Ora cu preveni esaki tin un ganashi caba, pero asina cu algo pasa cu e mucha por drenta den accion lihe y trat’e, dun’e cuido y guia. Pa asina minimalisa e trauma cu a sufri. Minister ta kere cu esaki tin mas balor cu e modo cu hopi biaha hendenan ta reacciona manera aworaki. “Mi ta hopi contento, mi ta felicita fundacionnan cu conhuntamente cu esunnan di departamento di Gobierno pa atende cu e tema asina complica.” E tema di sexualidad ta un tema hopi compleho y hendenan tin otro pensamento na con mester atende cu informacion riba sexualidad.
Tin hende ta bisa ora cu duna muchanan informacion riba sexualidad mas trempan, nan ta bay experimenta y tin hopi teoria. Mester informa muchanan di kico mag y kico no mag y esey ta e base pa ta proteha. “Si bisa e mucha cu hende no mag di mishi bo na cierto caminda. E mucha sa cu na momento cu nan kier haci esey ta algo fout, e por denuncia esey na su mayor of na un hende grandi.” Hopi bes ta e mayor mes ta e abusado pero e ora e mucha por papia cu otro mucha of cu juffrouw na scol, un famia, un wela, un tanta, pa asina ey e mucha por haya ayudo. “Na momento cu haci esey tuma luga tambe tin otro aspectonan masha complica lo bin dilanti. Ta hopi importante pa informa trempan y pa denuncia e cosnan aki pe bienestar di muchanan”, Minister Dowers a remarca. E departamentonan di Ministerio di Husticia t’ey pa proteha muchanan. E departamento di recherche di Polis ta ekipa pa atende cu na momento tin problema, pero esunnan cu ta e prome yama ta e trahadonan riba tereno preventivo, social, educativo. Nan por haci un diferencia hopi mas grandi.

CEA por sigui haci nan trabou cu busnan nobo

Dialuna mainta na Cuerpo Especial Arubano (CEA) a ricibi algun auto nobo pa asina nan por sigui haci nan trabou. E busnan a bin di Hulanda y Aruba tin un cooperacion cu Dienstvervoer en transport na Hulanda.
E departamento aki ta parecido na CEA, pero e unico cos ta cu e departamento ey ta haci ta un parti mas amplio cu transporte di tur tipo di preso, preso peligroso, terorista y los for di Cuerpo Policial Hulandes. Tambe nan tin material special cu nan ta uza pa esaki tambe y Aruba tin e cooperacion cu nan ta pasa e material pa aki, Minister di Husticia, Drs. Mr. Arthur Dowers a remarca. Na Hulanda nan tin rekisitonan hopi mas streng pa loke ta trata transporte y Aruba ta haya material e ora for di nan. “Den e ultimo tempo nos a logra yega na un cooperacion cu nos ta haya e autonan mas lihe. Y esey ta mustra tambe cu e ta facilita nos trabou, pasobra e ta un cooperacion caminda cu bo ta logra di pone bon material den disposicion di nos departamentonan”, Minister Dowers a remarca. Tambe e ta facilita no solamente pe trabou di trahadonan, pero ta transporta e preso tambe y ta transporta nan den condicionnan mas miho. E tambe ta alivia e trabounan, pasobra nan lo ta menos agita. “Con cu bay bin nan a comete un crimen, pero esey no ta nifica cu nan mester pasa den condicionnan mas fastioso cu tin”, asina Minister Dowers a remarca. Minister di Husticia ta contento cu e busnan aki tambe den servicio y tin servicionan mas miho cu antes. Por mira e cooperacion y relacion entre e diferente ministerio di Husticia di Reino ta sumamente bon. Esaki a bira hopi mas miho den e ultimo añanan y ta spera cu esaki lo keda asina aki of bira mas miho.
“Nos ta preparando na e momentonan aki pa bay e siguiente JVO cu lo bay ta na Juni na St. Maarten. E momento ey nos lo bay reitera e importancia di e cooperacion cu nos tin entre diferente ministernan”, Minister Dowers a remarca. Pa Ministerio di Husticia e siguridad di trahadonan ta hopi central, pero logicamente cu e trahadonan ta forma parti di comunidad. General Ministerio di Husticia ta traha pe siguridad di tur hende, pero na momento cu bo ta haci trabou bo mester percura pa tin material cu hendenan por haci nan trabou mas optimal cu ta posibel. “Un di e cosnan cu a demostra den e ultimo añanan ta cu e trahadonan ta sinti su mes mas confortabel mas positivo y mas dispuesto pa traha y duna mas di su mes, ora cu bo percura tambe di bo banda di cumpli cu loke e trahado tin derecho riba dje”, Minister Dowers a remarca. Grandemente nan a logra esey den na tur departamento, pero semper tin cosnan cu mester mehoracion. Semper tin cosnan cu despues di a logra yega un nivel hopi halto, mester bay atras pero esey ta parti di bida. E trahado mester ta convenci cu como dunado di trabou ta para pe y cu tin su interes na pecho. Minister di Husticia ta kere cu esey ta hopi cla cerca mayoria di trahado di husticia cu e cos a cambia y cu ta para 100% tras di trahadonan.

Cuerpo Policial ta haya 3 auto nobo pa sigui patruya

Diaranson mainta Minister di Husticia,  Arthur Dowers a bishita Garage Cordia Aruba pa inspecciona e autonan nobo pa Cuerpo Policial Aruba.
Na luna di Maart ultimo Cuerpo Policial Aruba a ricibi 2 auto nobo marca Toyota modelo Rav4 y e biaha aki nan lo ricibi 3 auto nobo, den forma di Pick-up Hilux dobel cabina y 4X4, pa asina nan por sigui cu nan trabou di combati criminalidad na nos fronteranan. Diabierna awor Cuerpo Policial Aruba lo ricibi yabi di e autonan nobo aki, pa asina Polisnan por cuminsa subi caya cu e autonan nobo y sigui haci nan trabou di patruya y combati criminalidad. Minister Dowers ta contento di mira cu Cuerpo Policial ta hayando autonan nobo pa asina nan por sigui cumpli cu pueblo di Aruba. E ta gradici Aruba Hospitality & Security Foundation pa e sosten incondicional cu Ministerio di Husticia y cu Cuerpo Policial pa promove mas siguridad banda di areanan turistico y rond di henter nos isla.

 

Bishita di Professor De Doelder serca Minister Dowers

Awemainta mi a ricibi bishita di Profesor Hans de Doelder, kende a wordo acompaña pa e abogado general di Aruba sr. van Deutekom.  A papia riba e ultimo desaroyonan di e “wetboek van strafprocesrecht” di pais Aruba, y e desaroyonan cu tin pa cu  cambionan den e ley aki.
Tambe a papia riba e desaroyonan cu tin den e cambionan cu tin den e ley aki den e otro paisnan di reino hulandes.

A reuni cu stakeholders tocante Beach Policy

Beachpolicy tawata e topico di discucion awe mainta. Ta asina cu hunto cu mi coleganan Minister Sr. Sevinger y Sr. De Meza, y tambe miembronan di AHATA, a discuti riba e topico aki. E intencion ta naturalmente pa tur hende ta riba e mesun liñea di pensamento, cual Ta preservacion di nos beachnan. Nos país a score hopi halto cu e beachnan mas bunita na mundo y e meta principal ta, cu hunto nos tin pa conserva esaki tambe. Un reunion cu a bay sumamente bon. Na e reunion aki tambe tawata tey sra. Dammers como ejecutivo di DIP y inspector di polis di e área di Noord, Sr. Hoo, di cuerpo Policial, presente.

 

 

Riba peticion di KvK y ATIA… A organisa un anochi informativo cu a carga e nomber di “Justice in Practice III”

Algun siman pasa, den luna di maart pa ta exacto, a organisa  “Justice in Practice II”. Dicho reunion a wordo organisa pa di tercer bes y tawata netamente pa informa diferente stakeholders, manera hunta di directiva di entre otro ATIA, AHATA, Camara di Comercio (KvK), riba e situacion di criminalidad aki na Aruba, como tambe tur loke cu e ministerio di husticia den su totalidad ta hasiendo tanto preventivo como represivo riba esaki. Despues di dicho encuentro ehecutivonan di directiva di Camara di Comercio y tambe ATIA, a haci apelacion na e titular encarga cu husticia, pa e departamentonan manera Cuerpo Policial, IASA y tambe Coast Guard, duna un presentacion na nan respectivo miembronan. Riba dicho peticion, a instrui su ministerio pa organisa e asina yama “Justice in Practice 4”. Esaki a tuma lugar dialuna den un di e salanan di Renaissance Convention Center. Mas o menos cien (100) persona cu ta den mundo comercial a bini hunto y a ricibi un presentacion amplio di parti di Cuerpo Policial y tambe IASA.
E presentacion riba su mes, tawata basa riba por ehempel, cuanto personal Cuepo Policial ta dispone di dje den e area turistico, con nan ta wordo reparti (ingedeeld), con nan ta patruya, e tipo di patruyanan cu tin etc. Tambe a enfatisa riba e retonan y risiconan cu tin y kico tur ta wordo hasi pa contra aresta esaki nan. Di parti di IASA, a splica basa riba cifra, riba e trend cu tin cu diferente nacionalidad na momento cu nan jega na nos frontera y tambe na omoneto cu nan ta bandona nos pais. Na final di e anochi informativo, sala a ricibi e oportunidad di hasi nan preguntanan. Varios pregunta a wordo haci, cual mayoria tawata mas bien regardando otro ministerionan. Asina mes a contesta esaki nan. Riba e topico di criminalidad mes no tawata tin mucho pregunta. Loke cu nos a conclui for di es nan presente tawata, cu awor nan tin un mihor bista di kico tur ta wordo haci den combatimento di criminalidad. Cu prome cu e anochi informativo aki, nan no tawata bon informa debi na poco informacion cu ta wordo duna na comunidad di parti di entre otro e departamentonan guvernamental mes. Segun e gremio comercial, cu si e informacion nan aki sali pa tur hende aki na Aruba, cu esaki lo frena y kisas hasta stop e sentimiento di miedo y temor cu a wordo crea innecesariamente den nos comunidad. E prome Justice in Practice a tuma lugar na ana 2015. Manera cu a wordo menciona caba, e ultimo edicio aki a wordo organisa pa ministerio di Husticia, riba peticion di Camara di Comercio y tambe ATIA.

Minister Dowers a entrega promocion na empleadonan di KIA

Diabierna mainta na Instituto Correccional  (KIA) a tuma lugar entrega di varios decreto gubernamental  den algun caso acompaña pa un insignia nobo  indicando e promocion den rango  di algun trahador di e institucion. Minister di Husticia Arthur Dowers a felicita tur cu a ricibi nan promocion y a remarca cu e la tuma nota di e adelanto tumando lugar den varios area den e institucion aki. E mandatario ta spera cu e adelanto aki continua mirando e condicionnan di trabou cu no tur ora ta esun di mas facil, sinembargo nan ta cumpli cu nan labor y awe esaki ta resulta den un promocion pa nan.  E titular a haci un apelacion na e empleadonan presente, pa  sigui haci nan trabou y tambe sigui motiva e otro ploegnan laborando apesar di e scarsedad di trahador  cu tin actualmente. Minister Dowers a finalisa felicitando tur cu a ricibi promocion y a informa cu ta trahando duro pa recluta personal nobo y ta spera cu e grupo aki lo por guia esakinan di mes manera cu nan a bin ta labora durante ultimo añanan.

Ministerio di Husticia lo organisa un dia informativo pa miembronan di KVK y ATIA

Den cuadro di e ultimo sesion di “Justice in Practice”, cu minister di husticia mr. Drs. Arthur Dowers a laga organisa na februari ultimo, awor ta preparando un evento informativo den e mesun cuadro pa tanto miembronan di camara di comercio, como tambe esnan di ATIA.  E evento informativo cu a hiba e nomber di “Justice in Practice”, teni na final di februari 2017, a cay na agrado di tur esnan cu tawata presente. Comentarionan cu por a tende rond di personanan di sector comercial, tawata cu pa nan ta di gran importancia sa, kico tur ta wordo hasi den parti di prevencion di crimen como tambe den ki tipo di forma nan tambe lo por contribui.

Departamentonan cu ta resorta bou di minister Dowers manera Kustwacht, IASA, Cuerpo policial y tambe PG mr. Van DAM, a elabora ampliamente di nan labor extenso y incansabel pa por garantisa seguridad y trankilidad den nos comunidad. Representantenan di ATIA y tambe KvK a haya e dia informativo aki cu minister Dowers a organisa, asina interesante, cu nan deseo ta pa e titular por organisa algo similar pa nan respectivo miembronan y den cuadra di esaki mes, cu e titular encarga cu husticia a duna instruccion caba, pa por planea pronto un dia informativo pa tanto miembronan di Camara di comercio como tambe es nan di ATIA. E fecha exacto no ta conoci ainda, pero a compronde cu esaki lo bay tuma lugar den final di luna di maart.

Minister Dowers y sr. Jim Hepple a reuni brevemente cu otro

Na e comienso di e siman nobo aki, Minister di Husticia mr. Drs. Arthur Dowers, a bishita CEO di AHATA, esta señor Jim Hepple, kende alaves ta encabesa e board di Aruba Hotel and Security Foundation. E bishita di trabou aki tawata den cuadro cu e ultimo desaroyonan cu tawata tin den e lasonan estrecho di bon cooperacion entre AH&SF y e ministerio di husticia. Ambos a discuti algun punto di interes comun riba loke ta seguridad di nos comunidad pero tambe di nos bishitantenan. Ta obvio cu pais Aruba ta disfrutando di un bon reputacion internacionalmente, danki na e grado halto di seguridad cu tin na nos pais. Nos ta conclui esaki basa riba e hecho cu mayoria di turista a remarca esaki den un encuesta teni recientemente y nos como ciudadano di pais Aruba mester sinti nos mes orguyoso cu esaki.

Minister Arthur Dowers cu un reflexion riba e ley contra uzo di saco di plastic

Entrante 1 di Januari 2017, a pasa un ley caminda cu saco di plastic no reuzabel a bira prohibi na pais Aruba. Ta haci un apelacion na pueblo, pasobra ta ripara cu hopi bes, ora cu ley cambia, tin hende ta tene nan mes na ley segun minister di Husticia, Arthur Dowers.
Por a mira na varios luga y e minister mes ta bay Chines y ta cana cu caha di webo of algo pasobra no tin saco. Pero a constata cu tin hende ta bende cuminda cu nan mester bay tene nan mes na ley. Por haya cu un multa di casi 10 mil florin of mas si bo ta viola ley of keda viola ley y no tin ningun rason pa haci’e. Si ta bende pastechi, si ta bende galiña of porkchop, sea bo ta uza saco di papel den tienda of e clientenan ta bin cu nan saco reuzabel.
Tin cu tuma nota cu e ley a pasa y ta prohibi pa duna saco na momento cu un hende cumpra den bo supermercado of den bo tienda of restaurant. Ta spera cu prensa duna esaki un bon cobertura pasobra cu e ta yuda pa por reduci e risiconan cu ta core pa loke ta medio ambiente y tambe ta yuda pa pone extra polis pa controla, pasobra mester di na pa controla bario y trafico y reduci criminalidad. En principio, e saco di plastic no ta causa daño grandi na un hende, pero si ta asina ey cu ta haci un apelacion y no sa ki momento polis ta bay yega. Laga no ta abo ta esun cu tin cu paga e prome multa, minister Dowers a splica.