Alexander van Dam nombra como Procurador General di Aruba

DSC_7294

Diabierna ultimo Conseho di Minister di Reino Hulandes a aproba nombracion di mr. Alexander van Dam como Procurador General di Aruba. E proceso a cana via Ministerio Publico di Aruba, pa Corte Comun di Caribe Hulandes, pa Conseho di Minister di Aruba, pa Minister Ronald Plasterk di Asuntonan di Reino, kende a manda e proposicion pa aprobacion den “Rijksministerraad”. E nombracion ta drenta na vigor desde 1 di juni 2016.

For di juni 2014 te cu recien mr. Alexander van Dam tabata Fiscal Mayor suplente na “arrondissement” Zeeland-West-Brabant, cu ta maneha 4 area, Zeeland, de Markiezaten (Tholen/Bergen op Zoom/Roosendaal), de Baronie (Breda/Oosterhout) y Hart van Brabant (Waalwijk/Tilburg). Pa cada area tin un “Gebiedsofficier” nombra cu ta mantene contacto estrecho cu Polis y cu Burgemeester.

Aki na Aruba e Procurador General nobo ta reemplasa mr. Marc Van Erve, cu te dia 26 di november 2015 a ocupa e puesto. Recientemente el a bandona Aruba pa bay disfruta di un pensioen bon mereci.

Procurador General ta e hefe maximo na Ministerio Publico, cu ta determina maneho cu e Fiscalnan ta hiba den nan trabou di conduci investigacionnan penal y ta conseha Minister di Husticia. Ora papia di Ministerio Publico, no ta referi na un ministerio den e termino tradicional di e palabra. Ministerio Publico no ta un ministerio manera por ehempel Ministerio di Husticia of Ministerio di Finansas. Tarea di Ministerio Publico ta regla via ley.

E miembronan di Ministerio Publico, cu ta Procurador General, Abogado General, Fiscal Mayor di Husticia y Fiscalnan di Husticia, hunto cu miembronan di Corte Comun di Husticia di Caribe Hulandes, hunto ta forma parti di e Poder Hudicial. Pa cuestion di maneho, Ministerio Publico ta resorta bou di Ministerio di Husticia.

E tarea primordial di Ministerio Publico ta para den articulo 3 di e Ley di Ordenanza riba e organisacion di e poder hudicial. Ministerio Publico ta encarga cu mantencion di ordenansa nan legal, persecucion di  hecho nan castigabel, ehecucion di sentencianan y decisionnan di Hues den casonan penal y control riba cumplimento cu decisionnan di Hues den casonan disciplinario.

Dakota a sali demostra union pa futbol Entusiasmo den e bario ta inmenso

RRA_1309

Ta for di algun siman caba ta sinti un union excepcional, entusiasmo sin igual pa e campeonato di futbol, di cual SV Dakota a clasifica pa hunga den playoff final. Diasabra a tuma luga e prome wega y e bario di Dakota a sali den gran forma pa bay wak wega!

E trayectoria di SV Dakota ta impresionante den e historia di futbol di nos isla, cu varios trofeo di campeon y cu un lista largo di hungadonan estelar cu a sali for di e ekipo color geel y preto. Sinembargo, e ultimo añanan e ekipo a confronta retonan y a tene por lo menos 8 aña largo for di playoff. E ultimo bez cu SV Dakota a titula campeon den futbol tabata den e campeonato 1995-1996, pues 20 aña pasa!

“Pero por mira aki claramente cu ora un bario uni y sostene e hungadonan, manera ta sosodiendo awor aki, cu cosnan grandi ta pasa. Mi a sinti e curason di Dakota bati duro diasabra anochi”, asina Minister mr. Drs. Arthur Dowers a duna di conoce. E mes, siendo un Dakotero, a bisti su flanel geel y a bay apoya su ekipo memey di e fanaticonan. E apoyo tabata asina grandi cu sin duda a traduci den hugadanan nechi y cu un final positivo pa Dakota.

“Mi mester bisa cu e wega no tabata facil, RCA a duna bon bataya y a demostra cu mester tene masha cuenta cu nan. Asina mes Dakota a planta respet y a manda un mensahe cla pa e demas 3 teamnan luchando pa e trofeo, cu nos ta determina pa bay cune e aña aki, dus pa wak caya”, asina e mandatario a termina bisando cu un sonrisa grandi di satisfaccion y alegria riba su cara.

 

Charla riba desaroyo saludabel via scolnan pa muchanan

DSC_9511

Recientemente a tuma luga un charla na duna dor di Cathrien Bijleveld, director di NSCR, cu ta e centro di investigacion na Vrije Universiteit di Amsterdam. Tambe e ta un Hoogleraar pa e “Research Methods in Criminology”. Un otro orador na e charla tabata Annemarie Slotboom cu ta un Hoogleraar na e mesun universidad Hulandes.

E charla tabata enfoca riba “gezonde ontwikkeling van kinderen via scholen”. Asina e expertonan ta conseha pa haci un encuesta na scolnan via un lista di pregunta. Ey facilmente lo por haya hopi informacion con ta lantando muchanan awendia na cas, kico ta e factornan cu ta yuda nan keda riba e caminda corecto y cua ta e factornan di risico cu por hiba nan riba mal caminda.

Mester menciona cu ya tin un acuerdo di cooperacion cu e universidad aki caba pa haci investigacionnan cientifico riba algun tema specifico, manera ta e causa di criminalidad bou hende muhenan Caribense. Es decir, kico ta causa cu hende muhe ta comete cierto delitonan. Ta premira cu for di e informacion cu lo sali di e investigacion aki lo por tuma cierto medidanan di prevencion pa evita.

Minister mr. Drs. Arthur Dowers tambe a participa na e charla aki, teni den e sala di reunion di TNO. El a haya e informacion comparti masha valioso mes, cu sin duda lo por yuda departamentonan di Gobierno trahando cu muchanan of hobennan cu ta cay den man di husticia, pa conoce e retonan cu nan ta biba den dje na nan cas y tambe ideanan di con por yuda tene e hobennan aki for di mal caminda y evita cu ta mancha nan imagen y nan nomber den e sistema hudicial.

Minister Arthur Dowers ta desea tur studiante forsa y motivacion

dowers op school

E ultimo periodo di prueba pa studiantenan den “examenklas” ta cuminsa e siman aki y Minister di Husticia mr. Drs. Arthur Dowers ta desea tur hoben forsa y motivacion pa cu e dianan nan dilanti.

Minister Dowers, como un promotor di e concepto di “lifelong learning”, ta encurasha tur studiante pa keda cu nan vision y energia positivo durante di henter e periodo di nan “schriftelijke examens” y pa nan inverti tur nan esfuersonan den cada materia, sin haci ningun excepcion, y te na e ultimo examen.

“Kere den bo mes y tur cos cu abo por ta. Concentra riba bo meta, y bo mision. Awo ta e momento pa saca e fruto nan di e tempo y energia cu bo inverti den e añanan, lunanan, simannan y dianan durante di bo estudio, dedica na bo estudio,” Minister Dowers ta subraya.

“Hopi exito den e dianan boso dilanti y hopi forsa. Keda consistente y enfoca riba bo meta y bo futuro”, e mandatario a conclui bisando den un mensahe na vispera di e prome dia di examen.

Enfermeria ta un profesion indispensabel den tur sociedad

DSC_0722

Minister di Husticia mr. Drs. Arthur Dowers ta manda palabranan di felicitacion pa enfermeronan trahando den tur instancia y ramonan di enfermerianan durante di e siman dedica na e profesion noble aki. “E ta un trabao hopi pisa, particularmente considerando con cosnan ta cambiando den mundo y mirando e presion riba e profesion,” Minister mr. Drs. Arthur Dowers a expresa.

El a bisa cu mester tin mas sosten pa e trabao duro cu e enfermeronan ta haci. Por a lesa algun critica riba e trabao y profesionalismo di enfermeronan ultimamente, pero ta un hecho cu enfermeronan ta dedica 100% na nan trabao y 100% di nan tempo y esfuersonan ta bay na brinda sosten y alivio na e persona cu nan ta brinda cuido, e mandatario a comenta.

El a agrega cu e enfermero ta brinda sosten valioso no solamente na pashentnan cu un kebrante di salud, pero tambe ta provee e apoyo na e persona cu no por cumpli mas of no por cumpli temporalmente pa cu e parti di su cuido cu usualmente e mes ta percura pa p’e.

“Enfermeria ta un profesion indispensabel den tur sociedad,” Minister Dowers a subraya, e enfermero su rol den e mundo di medicina ta sigui desaroya y e ta contribui grandemente na prevencion di enfermedad y desaroyo di cuido en general.

Concluyendo Minister Dowers ta desea tur enfermero un siman fabuloso y cu nan disfruta hopi di tur e muestranan di amistad y aprecio cu nan ta ricibi for di comunidad di Aruba, pa tur nan esfuersonan, profesionalismo y sosten, como tambe e guia y cuido cu nan ta brinda nan pashentnan tur dia.

Minister Arthur Dowers despues di Reunion cu Fundacion Lisette Gomes

20160509-minjus-fundacion-lisette-gomes-01

Presente na e Reunion aki banda di Representantenan di Fundacion Lisette Gomes tabata tin Fiscal Mayor y Representante di Voogdijraad pa asina pasa riba diferente punto caminda lo tabata tin mal informacion of inkietud pa cu aplicacion di Ley. Un reunion caminda a duna di tur banda un bon splicacion ta con nos Leynan ta core, tambe a toka e tema di Castigo Minimo cu no ta ser pidi mas door di e Fundacion door cu nan a haya un miho entendimiento pa cu esaki. Tambe a papia riba e malcontento na momento cu comunidad ta cuestiona cu e castigo aplica ta mucho abou segun nan sentimento y akinan tambe a brinda e Informacion riba e rol di Ministerio Publico y esun di e Huez cu ta dicta segun leynan Hulandes.

Minister Arthur Dowers a sigura cu victimanan ta keda central

DSC_0681

E desaroyonan despues di casonan di abuso sexual den nos comunidad awor ta haciendo cu mas hende, mas organisacion y mas departamento ta papiando habri riba e tema. E no ta un asunto facil y ta rekeri mas cu djis husticia pa por yega na preveni mas di e tipo di casonan lamentabel asina. Minister mr. Drs. Arthur Dowers sinembargo ta satisfecho cu tin mas comprension awor pa e retonan cu husticia tin cu atende cune diariamente, den nan esfuerso pa por yega na suficiente “prueba” pa presenta dilanti Corte pa persigui y condena e pedofielnan!

Siman pasa Minister di Husticia tabata presente na Bestuurskantoor pa ricibi manifestantenan durante di dos manifestacion, esta e protesta pa cu asuntonan di salud y e otro pa asuntonan di abuso di mucha y maltrato di menornan di edad en general. E mandatario a splica cu por a observa un biaha mas, na tur dos ocasion, cu tabatin dos grupo specifico. Un cu a protesta pasobra di berdad nan kier mira un cambio y mehoracion den e cuido y forma cu ta atende cu muchanan cu bira victima di abuso sexual y tambe a nota un di dos grupo cu mas bien a mustra un cara antagonista, pa busca confrontacion y pa hunga politica.

Minister Dowers a comenta cu tabata hopi importante pa por a combersa cu representantenan di e grupo na momento cu nan a ricibi e manifiesto. E mandatarionan a invita e representantenan pa un combersacion mesora y asina por a duna un splicacion pa cu desaroyonan cu a tuma y tumando luga den e ultimo añanan y cu tin varios punto menciona den e manifiesto cu tin solucion pa nan caba. Tambe tin parti di e problemanan cu ta tuma luga den henter e cadena di abuso di menor cu ta bon pa duna un miho splicacion na e personanan cu a protesta, pero tambe na comunidad pa evalua kico tur ta wordo haci.

Minister Dowers ta di opinion cu e servicionan cu ta wordo brinda na comunidad di parti di autoridadnan ta algo cu e victima mester sinti su mes bon cun’e y na momento cu e victima ta sinti cu e trato no ta adecua mester bin un evaluacion di kico por mehora den henter e cadena pa mehora e servicio. Na final di dia, e victima mester haya un trato cu e ta sinti su mes trankilo cun’e, cu confiansa cu husticia ta cana su caminda, pero tambe e sistema mester atende e parti psicologico/emocional di e victima.

E mandatario a bisa cu e ta sinti cu tin hopi persona envolvi den e proceso relaciona na cuido di victima, y cu mester mira unda exactamente e dolornan ta sinta y mester bin cu solucion pa nan. Minister Dowers a splica cu e aspecto di castigo ta algo cu ni Gobierno, ni Parlamento, ni Ministerio Publico no tin un bos aden, como cu e responsabilidad di castigo ta tarea di un Hues imparcial. Den caso cu e cliente no ta contento cu e sentencia, tin otro oportunidad pa wordo scucha pa Corte y por apela pa un caso unda cu tres Hues lo evalua e caso, el a agrega.

Un otro punto masha importante den e discusion y combersacion tocante di maltrato di menor, ta e leynan cu tin castigo maximo determina, pero no un castigo minimo. E mandatario a comenta cu ta masha facil pa trece un cambio den ley, pero mester pensa riba e embergadura di un cambio of cambionan haci sin un evaluacion profundo y corecto. Pa un cambio asina funciona lo mester haci cambio di castigo maximo pa castigo minimo pa un cantidad di delito, pasobra si acaso haci cambio di castigo maximo pa castigo minimo di un ley so, lo trece un desbalansa den nos sistema di hudicial.

Ministerio di Husticia no tin nada di haber cu ceramento di Aura Casino

DSC_1993

E hecho cu empleadonan di Aura Casino a bay protesta dilanti Bestuurskantoor contra decision di Minister di Husticia cu lo mester a otorga permiso pa e operador cera Aura Casino, ta basa completamente riba mal informacion. “Nos no ta duna permiso pa cera casino, solamente permiso pa habri y pa opera un casino. No ta compronde di unda a bay mal informa empleadonan cu nos lo a duna permiso pa e compania cera e casino”, segun Minister di Husticia, mr. Drs. Arthur Dowers a enfatisa.

 Den pasado Alegro Hotel a pidi un permiso pa opera casino den e hotel, cual Gobierno a honra tambe. E ultimo añanan, un otro compania a “lease” e casino for di e hotel y consecuentemente a maneha e casino y e empleadonan. Pero na un dado momento, e operador a stop cu su trabounan y a bandona e casino, lagando e trahadonan den un situacion di incertidumbre.

“Pero ta importante pa bisa, pasobra ta reina e percepcion bou di e empleadonan, cu Ministerio di Husticia lo por tin algo di haber cu henter e asunto ey. Mester aclaria cu e rol di Ministerio di Husticia ta solamente relaciona cu otorgamento di e permiso pa opera casino, cu den pasado a duna na e hotel”, asina Minister Arthur Dowers a splica.

Locual si a sosode ta cu na un dado momento, despues cu e casino a keda mas di 48 ora cera, cu Gobierno tin e opcion pa anula e permiso. Pero, e doño nobo di e hotel a pidi Gobierno pa no haci esey, pa mantene e permiso existente, pendiente nan keda cla cu un operador nobo pa sigui maneha e casino. “Pues no ta asina cu nos a duna permiso pa cera e casino, pasobra esey no ta nos autoridad. Nos ta controla casino pa nan cumpli cu rekisitonan legal mara na nan permiso y ta solamente si faya na cumplimento eynan por trek in nan vergunning”, di acuerdo cu Minister di Husticia.

Mas leu e mandatario a aclaria atrobe cu “No ta asina cu den e caso aki nos a trek in e vergunning y tampoco nos a deal cu e operador di e casino cu ta responsabel pa e trahadonan. Locual a sosode ta cu a bin un disputa entre e doño di e vergunning, pues e hotel, y e operador di e casino. E hotel a saca e operador afo debi cu nan no ta paga locual nan debe na e hotel, pero esey ta algo cu no tin nada di haber cu nos di Ministerio di Husticia”, manera Minister Dowers a enfatisa.

E ta haya cu e sindicato tin un rol pa splica su miembronan debidamente riba con e situacion ta hinca den otro, cu aki ta un disputa civil entre dos compania y cu aki no tin nada di haber cu Ministerio di Husticia, nada di haber cu e condicionnan mara na e permiso pa opera casino, etc. Ta sinti cu informacion robes a bay na e trahadonan, locual ta masha di lamenta.

Pesey ta reitera cu Minister di Husticia ta controla casino y no tin nada di haber den e relacion entre doño di trabou y nan trahadonan. Minister Dowers a reuni cu director di Departamento di Asuntonan di Casino, cu a confirma cu na ningun momento a duna ningun sorto di permiso pa cera casino pasobra esey no ta posibel y un permiso asina no ta existi. Locual a haci ta facilita pa hotel por mantene e permiso di casino pa por yuda nan yega na un otro operador mas pronto posibel.